29 июня 2016 г.
Çак эрнекун пирĕн районта та яваплă, пысăк пĕлтерĕшлĕ мероприяти старт илет. Пĕтĕм Раççейри ял хуçалăх çыравĕ агропромышленность комплексĕн ÿсĕмне малашлăха тĕпе хурса уçăмлатас тата çитменлĕхсене сирес стратегилле программăна хатĕрлеме пулăшĕ.
Çырав бланкĕсем тĕрлĕ тĕслĕ. Ял хуçалăх организацийĕсен вăл хĕрлĕрех сарă, ыйтăвĕсем те чылай. Фермерсен – сарă, хушма хуçалăхсен – симĕс, сад участокĕсен кăвак тĕслĕ.
Предприяти-организацисем Чăвашстата тăратакан отчетпа танлаштарсан çырав бланкĕнче хушма ыйтусем те пур. Сăмахран, хуçалăхра çĕнĕ технологипе усă курни, ăратлă выльăх-чĕрлĕх пурри, ĕçе-хĕле механизацилени тата ытти те. Организацисемпе фермерсенчен кредит, субсиди илнине (илнĕ пулсан мĕн тĕллевпе) ыйтса пĕлĕç. Инфраструктура, техника хатĕрĕ (электро, шыв, газ сечĕсем, телефон, интернет çыхăнăвĕ пурри тата ытти те) кăсăклантарĕ. Сад-дача хуçисем пĕрлĕхĕсенче хытарнă çул, хурал, пĕрлĕхĕн пĕтĕмĕшле лаптăкĕ, участоксен хисепĕ пирки тата ытти ыйтăва хуравлама тивĕç. Уйрăм хуçалăхсен çурт-йĕрте яланлăх пурăнакансен, кил-хуçалăхĕнче ĕçлекенсен йышне, чĕртавар мĕн тĕллевпе (çемьене тăрантарма, хушма е тĕп тупăш валли) туса илнине пĕлтермелле.
Ял хуçалăх организацийĕсен ертÿçисем перепиç хутне хăйсем çырса тултараççĕ. Фермер, хушма хуçалăхсене, уйрăм пайтаçă патне, сад-пахча пĕрлĕхне çыравçăсем çитĕç. Вĕсем планшетлă компьютерпа е ятарлă бланкпа усă курĕç.
Çырав хучĕсенче çыннăн ятне-шывне кăтартмаççĕ, çавăнпа информаци анонимлă. Саккун сведение сарма, налук, влаç органĕсене, предприяти-организацие, ыттисене пама чарать. Ыйтусене çын каланă тăрăх çырса тултараççĕ, документ кăтартмалла мар.
Переписчиксене тÿрех палласа илме май пулĕ. Вĕсем çутта каялла сапалакан йăрăмлă, çырав эмблемиллĕ кăвак жилет, уçă карттус тăхăннă, «Росстат» паллăллă кăвак портфель йăтнă. Çумĕнче – официаллă удостоверени.
Ял хуçалăх çыравĕ – çĕршыв пĕлтерĕшлĕ мероприяти. Эппин, ăна йĕркеллĕ ирттересси çынсенчен те килет. Переписчиксен ĕçне йывăрлатас мар тесе Чăвашстат ĕçченĕсем кил хуçисене йытăсене кăкарма е вольерсенче тытма ыйтаççĕ.
Çырав тĕлĕшпе ыйтусем пур пулсан тунтикунранпа Росстат ятарлă «вĕри лини» телефонне ĕçлеттерсе янă. Номерĕ – 88007072016. Ыйтусене 9–21 сехетсенче йышăнаççĕ. Шăнкăрав тÿлевсĕр, анонимлă. Чăваш енри «вĕри лини» телефонĕ – 8(8352) 397898.
Светлана ЧИКМЯКОВА.