21 июня 2016 г.
Кăçал пенсисене çĕнĕ йĕркепе индексаци туса ÿстереççĕ. Кун çинчен вулакансене Раççей Пенси фончĕн Чăваш Республикинчи уйрăмĕн управляющийĕ Роза Алексеевна Кондратьева каласа кăтартать.
– Роза Алексеевна, кăçалтанпа ĕçлекен çынсен пенсине мĕнле йĕркепе ÿстерсе тÿлеççĕ?
– 2015 çулхи декабрĕн 29-мĕшĕнчи 385-ФЗ номерлĕ Федераци саккунĕпе килĕшÿллĕн страховани пенсине тата унпа пĕрле тÿлекен çирĕплетнĕ виçене пур пенсионерăнне те индексацилеççĕ. Анчах ĕçленĕ тапхăрта пенси виçине индексаци ÿсĕмне шута илмесĕр тÿлеççĕ.
Февральтен 2015 çулхи 3-мĕш квартал отчечĕ тăрăх сентябрь уйăхĕн 30-мĕшĕ тĕлне ĕçлемен тата çулталăк вĕçне предприниматель пулман пенсионерсен пенсийĕсене ÿстертĕмĕр.
– Пенсионерсен ĕç пăрахни çинчен Пенси фондне заявлени тăратмалла-и?
– Октябрьтен пуçласа апрель уйăхĕччен ĕç пăрахни çинчен çынсен Пенси фондне пĕлтерсе заявлени çырмалла пулнă.
Апрель уйăхĕнчен организацисемпе предприятисем хăйсем патĕнче ĕç килĕшĕвĕпе е гражданла-правăллă килĕшÿпе ĕçлекенсем çинчен Пенси фондне кашни уйăхрах информаци тăратаççĕ. Çавăнпа та пенсисене ÿстерсе тÿлесси çинчен йышăну заявленисĕрех отчет сведенийĕсене усă курса тăватпăр. Пенсионер ĕç пăрахсан виçĕ уйăхран пенсине ÿстерсе тÿлетпĕр.
– Организацисем ĕçлекен пенсионерсене кăтартасшăнах мар пулсан е тата пенсионерсене официаллă вырнаçтармасăр ĕçлеттереççĕ пулсан мĕнле?
– Отчета кашни уйăхра 10-мĕш числоччен кĕске формăпа тăратмалла – ĕçлекенĕн хушаматне, ятне, ашшĕ ятне, СНИЛС номерне кăтартмалла.
Отчета тулли мар е тĕрĕс мар тăратсан тата срока пăсса ярсан ĕçпе тивĕçтерекенсене явап тыттараççĕ. Саккунпа килĕшÿллĕн кун пек организацисенчен кашни ĕçлекеншĕн 500 тенкĕ штраф шыраса илме палăртнă.
Граждансен çакна асра тытмалла – официаллă ĕçлесен пенси коэффициенчĕн калăпăшĕ çултан çул ÿссе пырать. ,çлекен пенсионерсен пенсине кашни çулах август уйăхĕнчен пенси коэффициентне кура шутласа ÿстереççĕ. ,çе пăрахсан вара, пĕтĕм пенси коэффициентне пур индекссем çине ÿстернĕ хакпа шутласа тÿлеме тытăнаççĕ.
– Апла пенси çине тухсан пĕчĕк шалу тÿлекен организацисенче ĕçлеме меллĕ мар. ,ç пăрахса заявлени çыракан пенсионерсен йышĕ ÿсрĕ-и?
– Пенсие тухсан малалла ĕçлесси çинчен кашни хăй йышăну тăвать. Ку, паллах, шалу укçинчен те, сывлăхран та тата ытти сăлтавсенчен те килет. Чăваш Республикинче пурĕ 335 пин çын страховани пенсийĕ илсе тăрать, вĕсен шутĕнче 22 проценчĕ ĕçлекен пенсионерсем. Февральтен ватлăхпа паракан страховани пенсийĕсен виçи вăтамран 470 тенкĕ хăпарчĕ – 11900 тенке çитрĕ.
Çулталăк пуçламăшĕнчен Пенси фондне пĕлтĕрхи октябрьтен пуçласа кăçалхи март уйăхĕнче ĕç пăрахнă пенсионерсем пĕтĕмпе 14,5 пин заявлени тăратнă, çав шутра 8 пин заявленине февральпе апрель хушшинче çырнă.
– Енчен те пенсие ÿстернĕ хыççăн çын ĕçе вырнаçать пулсан, пенси виçине пĕчĕклетеççĕ-и?
– Çук, пенсионер ĕçе вырнаçсан пенси виçине пĕчĕклетмеççĕ. Енчен те тепĕр индексаци тĕлне Пенси фондне организаци тăратнă отчет тăрăх пенсионер ĕçлекен шутланса тăрать пулсан, çак индексаци ÿсĕмне шута илмесĕр тÿлеççĕ.
– Роза Алексеевна, пенсионер ĕç пăрахсан пенси калăпăшĕ индексаципе пĕрле мĕн чухлĕ пулассине пĕлме пулать-и?
– Пенси фончĕн сайчĕ çинчи «Граждансен уйрăм кабинечĕ» электронлă сервис ĕçлет. Кунта çынсем килтен тухмасăрах пенси виçине пĕлме пултараççĕ.
Ку тата ытти Пенси фончĕн сервисĕсемпе Патшалăх пулăшăвĕсен пĕрлехи порталĕнче регистраци тунă çынсем усă курма пултараççĕ. Кам порталта регистраци туман, вĕсем хăйсем тĕллĕн е Пенси фончĕн специалисчĕсем пулăшнипе тума пултараççĕ, кунтах ЕСИА системинче учетра паллă тунине (учетная запись) çирĕплетеççĕ.
Раиса АНДРЕЕВА.