04 июня 2016 г.
Истори преподавателĕн Олег Михайлович Григорьевăн харăсах виçĕ студентки – Валерия Дмитриева, Татьяна Петрова тата Оксана Романова – шкулсем, вăтам професси пĕлĕвĕ тата аслă пĕлÿ паракан шкулсем хушшинче культура теорийĕпе тата историйĕпе иртнĕ Атăл тăрăхĕнчи олимпиадăра çĕнтернĕ.
Хĕрсем хăйсене икĕ тапхăрта та пуринчен аван кăтартнă, Раççей киновĕн çулталăкне халалланă заданисене çăмăллăн пурнăçланă.
Олег Михайловичăн тепĕр вĕренекенĕ вара, Кристина Сурова, регионсем хушшинчи «Юность Большой Волги» конференци-фестивальте пĕрремĕш вырăн йышăннă. Ку ăс-хакăл тупăшăвĕ те икĕ тапхăрпа иртнĕ. Финалта хĕрача наука руководителĕ ертсе пынипе «Музей тата краеведени кружокĕн шырав ĕçĕ-хĕлĕ» ĕçĕпе хутшăннă. Пуян содержаниллĕскере жюри чи лайăх хак панă.
Шупашкарти Н.В.Никольский ячĕллĕ професси колледжĕнче пурнăç хăрушсăрлăхĕн никĕсĕпе иртнĕ республика олимпиадинче те палăрнă студентсем.
Пурнăçра инкеклĕ тĕрлĕ лару-тăруран тухма вĕрентес тĕллевлĕ ăс-тăн тупăшăвĕ теори тата практика тупăшăвĕсене пĕрлештернĕ. ОБЖ преподавателĕ Владимир Максимов тата физкультура преподавателĕ Галина Павлова ертсе пынипе пĕр команда 1-мĕш, тепри 5-мĕш вырăнсене йышăннă. Çĕнтерÿçĕсем – Юлия Григорьева, Эдуард Федоров, Антон Павлов, Никита Федоров.
Светлана ЧИКМЯКОВА.