01 июня 2016 г.
Космонавтика кунне халалласа республикăра тухса тăракан «Советская Чувашия» хаçатра пичетленнĕ сăнÿкерчĕк Вăрнар районĕнчи Вăрман Кипекри Абрамовсен –Тимофеевсен мухтавлă йăхне аса илтерчĕ. Ара унта Юрий Гагаринпа пирĕн ентеш Николай Тимофеев полковник калаçса тăраççĕ.
Çакă паллă. Иртнĕ ĕмĕрти çĕнĕ самана пуçлансан Наталипе Тимахви Абрамовсен икĕ ывăлпа виçĕ хĕр çут тĕнчене килеççĕ. Ÿссе çитсен тăваттăшĕ аслă пĕлÿллĕ пулаççĕ.
Николай Тимофеев шкул пĕтернĕ хыççăн Харьковри çар авиаци училищинче вĕренет. Тăван çĕршывăн Аслă вăрçине хастар хутшăнать. Истребительпе вĕçсе тăшмана пайтах сиен кÿрет. Вăрçă вĕçленсен вăл Оренбургри çар училищинче пулас летчиксене – курсантсене вĕрентет. Кунта ытти курсантсемпе пĕрле пулас пĕрремĕш космонавт Юрий Гагарин та вĕреннĕ. 1961 çулхи кĕркунне, космосра вĕçнĕ хыççăн, Ю.Гагарин хăйне вĕрентнĕ çынпа сăн ÿкерĕннĕ. Отставкăна тухнă хыççăн мухтавлă летчик Чăваш енре час-часах пулать, ял-йышпа курнăçать.
Тепĕр ывăлĕ Петр Тимофеев шкулта учительте, парти органĕсенче яваплă ĕçсенче тăрăшнă. Каярахпа Мускавра студентсене вĕрентнĕ. Пĕр хĕрĕ, Елизавета Тимофеевна, Канаш районĕнчи Ямаш шкулĕнче вуншар çул учительте вăй хунă. Кĕçĕнни Алевтина Тимофеевна пир-авăр техникумĕнче студентсене вĕрентнĕ. Абрамовсен чи аслă хĕрĕ Антонина Михайловна электроаппаратсен заводĕнче нумай çул ырми-канми ĕçленĕ, орденпа медальсене тивĕçнĕ.
Чăн та, Вăрман Кипекре ÿснисем хушшинче мухтава тухнă ĕçченсем сахал мар.
Вениамин ИВАНОВ.