01 июня 2016 г.
Районта Пĕтĕм Раççейри библиотекăсен кунне анлă паллă турĕç. Вăрнар тăрăхĕнче 41 библиотека ĕçлет. Вĕсенче 54 библиотека ĕçченĕ тăрăшать.
Професси уявĕ ячĕпе библиотекарьсене район администрацийĕн пуçлăхĕн çумĕ – йĕркелÿпе кадр ĕçĕсен тата юридици службин пайĕн пуçлăхĕ Андрей Матвеев, культура пайĕн пуçлăхĕ Ирина Алексеева, ял тăрăхĕсен пуçлăхĕсен канашĕн председателĕ Олег Петров, районти тĕп библиотека директорĕ Надежда Лукина саламларĕç, районăн обществăлла пурнăçĕнче активлăхпа палăрнăшăн, вулакана кĕнеке патне явăçтарнăшăн тав турĕç, ăнăçу сунчĕç. Тăрăшуллисене Чăваш Республикин культура министерствин тата район администрацийĕн Хисеп хучĕсемпе чысларĕç. «2016 çулхи чи лайăх библиотекарь» конкурс çĕнтерÿçи вара Çарăклă библиотекин ĕçченĕ Любовь Николаева пулса тăчĕ.
К.ЮРЬЕВ.