01 июня 2016 г.
Ачасене хÿтĕлемелли пĕтĕм тĕнчери кун тĕлне Раççей Следстви комитечĕн республикăри следстви управленийĕ çула çитменнисем хутшăннипе пулнă пулăмсене тишкернĕ. Инкексем, тĕпрен илсен, шывсем çинче, нумай хутлă çуртсенчен ÿкнипе, пушарсенче, ашшĕ-амăшĕ ачисене нумай вăхăтлăха хăварнине пула çырăннă.
Пĕлтĕр тата виçĕмçул аслисем асăрхавсăр хăварнипе пĕве-юханшывсенче сакăршар ача путса вилнĕ. Ÿсĕмĕ – 3–13 çулхисем. Инкексем ытларах яллă вырăнсенче, ачасем хăйсем тĕллĕн шыв хĕррине кайнипе, ишме пĕлменнипе пулнă.
Пĕлтĕр кĕçĕннисем чÿречерен тухса ÿксе вилнĕ икĕ тĕслĕх (2014 – 4) пулнă, 5-ĕн (2014 – 22) аманнă. 1–5 çулсенчи ачасем инкеке лекни каллех аслисен айăпĕпе пулнă: ывăл-хĕрне асăрхавсăр хăварнă, сĕтел-пукана чÿрече çывăхне вырнаçтарнă, кантăксем çине блокировка устройствисем лартман.
2015 çулта пушарсенче 4 ачан пурнăçĕ татăлнă, 2014 çулта – 8. Кăçал Элĕк районĕнчи Вырăс Сурăмĕнче пĕр каçра çичĕ çын, вăл шутра тăватă ача, вилни халăхра тĕрлĕ пăлхану çуратрĕ. Следстви комитечĕ, тишкерÿсем тунă хыççăн, инкексем ытларах уйрăм çуртсенче, ялсенче пулнине палăртать. Пушарсен тĕп сăлтавĕсем – ачасене асăрхавсăр хăварни, кăмакасемпе, электрооборудованипе тĕрĕс мар усă курни.
Чăваш енри Следстви управленийĕ ачасен прависене хÿтĕлессине тĕп вырăна лартать. Пĕлтĕр çула çитмен 146 ача тĕлĕшпе 195 уголовлă ĕç пуçарнă. Кăçал 42 çамрăк тĕлĕшпе 44 ĕç. Статистика сведенийĕсемпе пĕлтĕр аслисем çулталăкченхи 10, 1–14 çулсенчи 77 ачана, 15–17 çулсенчи 59 çамрăка нуша кăтартнă. Кăçал ку цифрăсем çапла – 4:29:9. Ар сĕмĕллĕ преступленисенче иртнĕ çул 40 ача шар курнă, 16-шĕ 15 çул та тултарман. Кăçал кунашкал тискерле 8 ĕç çырăннă, 6-шĕ 15-е те çитмен. Пĕлтĕр тата кăçал следовательсем судсене 108 тата 25 ĕç ярса панă.
Следстви управленийĕн ĕçченĕсем ачасем тĕлĕшпе тимлĕ пулма ыйтаççĕ. Вĕсем нуша курнине «Ача хăрушлăхра» телефон линийĕн номерĕсемпе – 8(8352) 624-657 е 123 (кĕсье телефонĕ) шăнкăравласа пĕлтермелле. Пур шăнкăравпа та тĕрĕслевсем ирттерĕç.
Аякра ан тăрăр – ачасене асапланма ан парăр!