28 мая 2016 г.
Шĕнер Ишекри шкулта юлашки шăнкăрав уявне çурхи илемпе витĕннĕ, чечексем сарăлнă килкартинче ирттерчĕç. Вĕренекенсем класăн-класăн линейкăна тăрса тухнă, уяв тумĕсем тăхăннă, алăсенче – чечек çыххисем.
Шкул директорĕ, Чăваш Республикин тава тивĕçлĕ вĕрентекенĕ, чăвашла питĕ уçăмлă калаçма вĕренсе çитнĕ вырăс хĕрарăмĕ Татьяна Скворцова хăнасене, вĕренекенсене саламлать. Раççей Гимнĕ янăраса каять.
Александр Ильин, Вăрнар район администрацийĕн ĕçченĕ, уява пуçтарăннисене ăшшăн саламларĕ, ăнăçу сунчĕ. Вăл кунта пушă алăпа килмен, вĕренÿпе спортра мала тухнă ачасене мухтав хучĕсемпе, грамотăсемпе чысларĕ.
Вĕрентÿпе вăрçă ветеранĕ, чылай çул кунта директорта, шкул çурчĕсене çĕнĕрен тăвас тĕлĕшпе хастар ĕçленĕ Семен Краснов ачасене тарăн пĕлÿ илме сывлăх сунчĕ. Уява килнисене вырăнти администраци пуçлăхĕ Р.Убаков, ачасен амăшĕсем ячĕпе Л.Давыдова саламларĕç. Юлашки шăнкăрав уявĕ кашни класс хăй пултарулăхне кăтартнипе вĕçленчĕ.
Иван ЕГОРОВ,
Раççей Федерацийĕн вĕрентÿ отличникĕ.