18 мая 2016 г.
Кăçал Санарпуçĕнчи вăтам шкул хăйĕн 125 çулхи юбилейне паллă тума хатĕрленет. Çак тапхăрта нумай-нумай шкул ачи пурнăçăн анлă сукмакĕ çине тухнă. Вĕсен хушшинче – тĕпчевçĕсем, учительсем, спортсменсемпе врачсем, çĕр ĕçченĕсемпе çар çыннисем тата ытти вун-вун професси çыннисем.
Шкул пĕтернисем тăван шкулпа халĕ те тачă çыхăну тытаççĕ. Вĕсенчен пĕри – биологи наукисен докторĕ, профессор, Чулхула ял хуçалăх академийĕн кафедра ертÿçи Валериан Иванович Великанов. Ĕçри çитĕнÿсемшĕн вăл «Раççей Федерацийĕн аслă вĕренĕвĕн тава тивĕçлĕ ĕçченĕ» ята тивĕçнĕ.
Валериан Великанов Санарпуç вăтам шкулне 1964 çулта вĕренсе пĕтерет. 1975 çулта Н.Э.Бауман ячĕллĕ ветеринари институтĕнчен хĕрлĕ дипломпа тухать. 1981 çулта кандидат диссертацине, 1993 çулта доктор диссертацине ăнăçлă хÿтĕлет. В.И.Великанов профессор радиобиологи тата ветеринари фармакологине тĕпчессине тĕпе хунă. Çак темăсемпе 200 ытла наука ĕçĕ çырнă.
Валериан Иванович час-часах энциклопедисемпе словарьсене тата хăй çырнă кĕнекесене шкула парнелет. Санарпуç шкулĕнче вĕренекенсем вĕсемпе хаваспах паллашаççĕ, вĕренÿре усă кураççĕ. Сумлă ентешпе чун-чĕререн мухтанаççĕ.