18 мая 2016 г.
Майăн 11-мĕшĕнчен пуçласа 13-мĕшĕччен районта çамрăк армеецсен юхăмĕн финалти вăййисем иртрĕç. «Орленокра» 7 команда, «Зарницăра» 13 команда тупăшрĕç.
Çар вăййисене савăнăçлă лару-тăрура хупрĕç. Район администрацийĕн пуçлăхĕ Леонид Николаев, вĕрентÿ тата çамрăксен политикин пайĕн пуçлăхĕ Маргарита Тихонова, Чăваш Республикин çар комиссариачĕн Йĕпреç тата Вăрнар районĕсенчи пайĕн пуçлăхĕ Владимир Венедиктов уйрăм конкурссенче палăрнисене Хисеп хучĕсемпе чысларĕç. Кăçал «Командир малта пырать» конкурса пĕрремĕш хут программăна кĕртнĕ. «Зарницăра» Вăрнарти 2-мĕш шкулти Алексей Краснов, «Орленокра» Хапăс шкулĕнчи Филипп Почемкин пĕтĕмĕшле кăтартусенче çĕнтерÿçĕсем пулса тăчĕç. «Орленок» уйрăмĕн командисем хушшинче Вăрнарти 1-мĕш шкул пĕрремĕш вырăна тухрĕ. Иккĕмĕшпе виççĕмĕш вырăнсене Вăрнарти ял хуçалăх техникумĕпе Калинино шкулĕн командисем пайларĕç. «Зарница» уйрăмĕн командисем хушшинчи тупăшура Калининăри вăтам шкул команди çĕнтерчĕ. Иккĕмĕш вырăна Вăрнарти 2-мĕш шкул тивĕçрĕ. Хапăсри пĕтĕмĕшле пĕлÿ паракан вăтам шкул виççĕмĕш пулчĕ.
Çĕнтерÿçĕ-командăсем район чысне республикăри финалти вăйăсенче хÿтĕлĕç.
Юрий КОРНИЛОВ.