14 мая 2016 г.
Пĕтĕм Раççейри ял хуçалăх çыравĕ çывхарать. Вăл «Ял йĕркелĕхре – çĕршыв тухăçлăхра» девизпа иртет. Çырав июлĕн 1-мĕшĕнчен тытăнса августăн 15-мĕшĕччен пырать. Ун уйрăмлăхĕсем тата çырав ĕçĕсем пирки Пĕтĕм Раççейри ял хуçалăх çыравĕн Вăрнар районĕнчи уполномоченнăйне Зинаида Федоровна Ластухинана каласа кăтартма ыйтрăмăр.
– Зинаида Федоровна, çынсем яваплă тапхăр пирки ытларах пĕлесшĕн. Çыравçăсем пур киле те çитеççĕ-и?
– Çапла, çак тапхăрта переписчиксем кашни уйрăм хуçалăха, кашни хресчен (фермер) хуçалăхне çитĕç, вĕсен хуçисен сăмахĕсем тăрăх çырав хучĕсене тултарĕç. Анчах пăшăрханма кирлĕ мар – выльăх пуçне, йывăçсене, ытти хуралтăсене шутламаççĕ.
Мĕнпур ял хуçалăх объектне çырса тухма палăртнă. Переписчиксем вĕсене 8–21 сехетсенче çаврăнĕç. Вĕсен çумра патшалăх статистикин федераллă службин удостоверенийĕ тата çырав эмблемин атрибутики пулĕ. Унсăр пуçне, çынсем ятарлă номерпе инструктор участокне шăнкăравласа хăйсем патне килнĕ çын чăнах та переписчик пулнине тĕрĕслесе пĕлме пултараççĕ.
– Халăха, чи малтанах, информаци конфиденциаллăхĕ шухăшлаттарать...
– Конфиденциаллăх пирки пăшăрханма кирлĕ мар. Çырав хучĕсем çинче хушаматсем те, хуçалăхсен адресĕсем те пулмаççĕ. Вĕсем тăрăх информаци кам çинчен пынине пĕлме те май килмĕ. Çитменнине, уйрăм информаци нимĕнле кăсăклăх та çуратмасть. Статистикăна çыравăн пĕтĕмлетÿллĕ даннăйĕсем кирлĕ.
Çырав хучĕсенчи информацие саккун хÿтĕлет, вĕсене уçăмлатнăшăн должноçри çынсене явап тыттараççĕ. Сведенисене налук, шалти ĕçсене тата ытти органсене тăратмаççĕ. Çавăнпа та Пĕтĕм Раççейри ял хуçалăх çыравĕ вăхăтĕнче халăхпа килĕштерсе ĕçлессе шанатăп.
– Районта миçе инструктор участокĕ ĕçлĕ тата вĕсем ăçта вырнаçĕç?
– Пĕтĕм Раççейри ял хуçалăх çыравĕ валли тăватă инструктор участокĕ йĕркеленĕ. Вĕсем çак адрессемпе вырнаçнă, Вăрнар поселокĕ, Ленин ур., 61-мĕш «а» çурт, тел. 2-59-92; Калинино сали, Гагарин ур., 28-мĕш çурт, тел. 60-2-73; Кĕçĕн Кипек сали, Шкул ур., 11-мĕш çурт, тел. 60-9-47; Çĕрпел сали, Советски ур., 2-мĕш «а» çурт, тел. 60-5-89. Çырав вăхăтĕнче çынсем хăйсене кăсăклантаракан ыйтусемпе ку участоксемпе çыхăнма пултараççĕ.
– Калаçушăн тав.
Светлана ЧИКМЯКОВА калаçнă.