14 мая 2016 г.
Ишлĕсем Аслă Çĕнтерÿ уявне паллă тума йышлăн пухăнчĕç. Шĕнер Ишек ял администрацийĕн пуçлăхĕ Радим Убаков митинга уçса ырă сăмахсем каларĕ. Вырăнти шкул директорĕ Татьяна Скворцова ертсе пынипе шкул ачисем концерт кăтартрĕç. Çамрăк ăру çĕнтерÿçĕ-ăрăва сума суни кашни номертех палăрчĕ. Ачасем хыççăн «Калинушка» ушкăн уява килнисене хăйĕн пултарулăхĕпе савăнтарчĕ. Çавăнпа пĕрлех ялта ÿссе çитĕннĕ, халĕ Мускав хулинче пурăнакан Анатолий Трофимович Назаров полковник тăван ял-йыша уяв ячĕпе саламларĕ. Калас пулать, çак уява хатĕрленсе ял халăхĕ те алă усса лармарĕ. Урамсене тирпейлеме ваттисем те, çамрăксем те хастар хутшăнчĕç.
Çакăн пек маттур та хастар çынсем пурăнакан Ишлĕ ялĕнче клуб та кирлĕ. Вăрнар администрацийĕ пире пулăшасса шанас килет.
Валентина ПОЛЫТОВА.