27 апреля 2016 г.
Çулталăкăн пĕрремĕш кварталĕнче мĕнпур тытăмри хуçалăхсенче мĕнле ĕçленине пĕтĕмлетнĕ. Çак тапхăрта 7863 тонна сĕт туса илнĕ, çав шутра ял хуçалăх предприятийĕсенче – 3022,3 тонна (иртнĕ çулхи çак тапхăртинчен 6,5 процент ытларах). Вăрнарти аш-какай комбинатĕнче, «Мураты», «Янгорчино» кооперативсенче, А.Фадеев, С.Лукина, А.Лукин фермерсен хуçалăхĕсенче сăвăм ÿснĕ.
Кăçалхи виçĕ уйăхра мĕн пур тытăмри хуçалăхсенче 1645,9 тонна аш туса илнĕ, çав шутра ял хуçалăх предприятийĕсенче – 835,5 тонна (пĕлтĕрхи çак тапхăртинчен 19,2 процент нумайрах). ,ç кăтартăвне Вăрнарти аш-какай комбиначĕн хушма хуçалăхĕнче, К.Маркс ячĕллĕ, «Луч», «Броневик», «Мураты» кооперативсенче, «Кольцовка» агрофирмăра ÿстернĕ.
Ака уйăхĕн 1-мĕшĕ тĕлне мĕнпур тытăмри хуçалăхсенче мăйракаллă шултра выльăх-чĕрлĕх 16727 пуç шутланнă, хушка пуçсем – 7932. Мăйракаллă выльăх-чĕрлĕх аграри предприятийĕсенче – 6535 пуç, ĕнесем – 2662. Мĕнпур тытăмри хуçалăхсенче сыснасем – 16749 пуç, ял хуçалăх предприятийĕсенче – 15376. Пĕтĕмĕшле илсен пĕрремĕш кварталта аграрисенче мăйракаллă шултра выльăх-чĕрлĕх 294 пуç, ĕнесем – 98, сыснасем 261 пуç хушăннă.
«Броневик», «Мураты», «Хорнзор», «Знамя» кооперативсем, Вăрнарти аш-какай комбиначĕн хушма хуçалăхĕ тĕллевлĕ ĕçленĕ – мăйракаллă шултра выльăх-чĕрлĕх хисепне ÿстернĕ.
Ку тапхăрта 830 пăру илнĕ, пĕлтĕрхи çак вăхăтринчен 138 пуç ытларах. Сысна çурисем – 5694 пуç. 100 ĕне пуçне 24 пăру, 100 ама пуçне 553 çура илнĕ. Виçĕ уйăхри кăтартусем тăрăх, 100 ĕне пуçне пăру илес енĕпе «Броневик», «Знамя» кооперативсем, «Кольцовка» агрофирма малта.
Район администрацийĕн ял хуçалăхĕпе экологи пайĕнчен пĕлтернĕ тăрăх, вăрнарсем пĕрремĕш кварталта сĕт, аш-какай туса илессипе, мăйракаллă шултра выльăх-чĕрлĕх, сыснасен йышĕпе республикăра каллех виççĕмĕш вырăн йышăннă.
Е.ТОЛСТОВА.