23 апреля 2016 г.
Районти культура çуртĕнче Вырăнти хăйтытăмлăх ĕçченĕн кунĕ ячĕпе савăнăçлă пуху иртрĕ.
Пенсие тухнăранпа патшалăх служащийĕсене никам та кун пек пухманччĕ. Ака уйăхĕн 19-мĕшĕнче ял Совечĕсенче 20-мĕш ĕмĕрте вăй хунă председательсене, секретарьсене, хальхи пуçлăхсене, специалист-эксперчĕсене, çавăн пекех халăх депутачĕсене пуçтарнă.
Чылай ăшă сăмах илтме тÿр килчĕ пире, хăй вăхăтĕнче нимĕнле йывăрлăхран та хăраса тăман, патшалăхшăн, халăхшăн мĕнпур вăя парса ĕçленĕ ветерансене. Пирĕн ĕçе çулсем иртнĕ хыççăн та хакланăшăн савăнас килет.
Хамăн профессипе ĕçлейменшĕн пĕртте кулянмастăп. Хăйтытăмлăх сферинче ĕçленĕ 25 çул хушшинче йывăрлăхĕ те, лайăх енĕ те пулнă. Пурпĕр пуçа усман, малаллах талпăннă.
Чи хавасли – çак уявра пĕрле тăрăшнă ĕçтешсемпе курнăçни. Тивĕçлĕ канура пулсан та ахаль лармаççĕ вĕсем. Выльăх-чĕрлĕх тытаççĕ, ачисене пулăшаççĕ, мăнукĕсене ÿстереççĕ. Хальхи политикăпа кăсăкланаççĕ. Çавăн пекех район хаçачĕпе тусли те куç умĕнчех.
Уявра районти культура çурчĕн ĕçченĕсем пысăк концерт кăтартрĕç. Хыççăн пире, ветерансене, вĕри чейпе, пылак çимĕçпе сăйларĕç.
Анна ПЕСКОВА.
Пăваяль.