20 апреля 2016 г.
Калининăри Мăн Çавал урлă хывнă вăхăтлăх кĕпер çурхи ейÿпе татăлса кайнине пĕлтернĕччĕ.
Инкек вырăнĕнче Чăваш Республикин Министрсен Кабинечĕн Председателĕ Иван Моторин пулнă. Кĕпере юсаса пĕтерменнин тĕп сăлтавĕ шутне вăл «Чувашавтодор» укçа-тенкĕ йывăрлăхне кĕрсе ÿкнине, пăрăссене тÿлесе илейменнине кĕртнĕ, çавăнпа строительствăна вĕçне çитерейменнине палăртнă.
Паллă ĕнтĕ, хальхи вăхăтра подрядчикпе килĕшĕве татнă, юсава çĕнĕ организаци – «Воддорстрой» тулли мар яваплă общество – пуçăнмалла. Иван Моторин Калининăра пĕлтернĕ тăрăх, çĕнĕ подрядчикăн генеральнăй директорĕ кĕпер çинчи ĕç уйăхлăх иккенне, объектри ĕçсене май уйăхĕнче вĕçлеме кирлине палăртнă.
Кĕпер çинче район администрацийĕн пуçлăхĕ Леонид Николаев та пулнă. Вăл строительствăна тăсса янин тепĕр сăлтавне палăртнă: проектпа маларах пăрăссене кăна улăштарма пăхнă, анчах та конструкцие салатсан кĕперĕн тĕревĕсем те çирĕп марри палăрнă.
Ейÿ вăхăтĕнче икĕ метра яхăн хăпарнă шыв халĕ чакнă. Район администрацийĕн строительствăпа ЖКХ пайĕн пуçлăхĕ Юрий Романов пĕлтернĕ тăрăх, вăхăтлăх кĕпере юсасси «Чувашавтодорăн» тивĕçĕ, çак кунсенче ку енĕпе ĕçсем хĕрÿ пырĕç. «Воддорстрой» ТМЯО та тĕп кĕпере юсама тытăннă.
Светлана ЧИКМЯКОВА.