20 апреля 2016 г.
В.В.Бианки ячĕллĕ Мускаври ача-пăча библиотекинче «Чăваш ен сăррисем» конкурсăн черетлĕ тапхăрĕн çĕнтерÿçисене чысланă.
Регионти ку проект кăçалтанпа Патшалăх Думин Комитечĕн председателĕн вĕрентÿ енĕпе тимлекен заместителĕ, «Единая Россия» партин Генеральнăй канашĕн Президиумĕн членĕ Алена Аршинова хÿтте кĕнипе пурнăçланать.
Конкурса хутшăнакансене – ача садне çÿрекенсене, шкул ачисене, ача-пăча библиотекисен вулавçисене – творчество заданийĕ хушнă: Чăваш ен сăнне ÿкерчĕксенче кăтартмалла. Палăртма кăмăллă, унта Чăваш енри çеç мар, Мускаври, Санкт-Петербургри, Ленинград облаçĕнчи наципе культура автономийĕнчи 300 ытла ача ÿкерчĕксем тăратнă.
Библиотекăра проект финалисчĕсен ĕçĕсен куравне, Чăваш ен историне, культурине тата çутçанталăк пуянлăхне халалланă кĕнекесен экспозицине йĕркеленĕ. Çамрăк художниксене Ăслă кушак аçи кĕтсе илнĕ, кашнине чăвашсен ваттисен сăмахĕсене тата каларăшĕсене çырнă тĕркеме тыттарнă.
Çăматă йăвалассипе, пичет графики тата каллиграфи енĕпе интерактивлă мастер-классем иртнĕ. Хăнасем Улăп çинчен калакан эпосри йĕркесене перопа çырнă. Фолианта Чăваш ене ярса панă. Финалистсене проект координаторĕ, Раççей Патшалăх Думин депутачĕ Алена Аршинова саламланă. Вăл та фолиантра «Улăпри» йĕркесене çырнă.
Пухăннисем умĕнче пирĕн ентеш те, Вăрнарта çуралса ÿснĕ, Раççей чăвашĕсен федераллă наципе культура автономийĕн вице-президенчĕ Анатолий Григорьев, ыттисем тухса каланă. Концерт программинче наци юрри-кĕвви янăранă.