20 апреля 2016 г.
Сочире Пĕтĕм тĕнчери «Пĕрлĕхлĕ тĕнче – пĕрлĕхлĕ сывлăх» VI ветеринари конгресĕ иртнĕ. Унта патшалăх ветеринари службин уйрăмах палăрнă специалисчĕсене чысланă.
Конгресс йĕркипе «Ветеринари ĕç династийĕсем» Пĕтĕм Раççейри конкурс çĕнтерÿçисене те чысланă. Палăртма кăмăллă, кăçалхи конкурс çĕнтерÿçи Вăрнар районĕнчи Авруй ялĕнчи Лабиновсен династийĕ пулса тăнă.
Чыслава Вăрнарта пурăнакан Аркадий Павлович Лабинов, унăн шăллĕн ывăлĕ Владимир Лабинов та хутшăннă. Тава, наградăсене тивĕçнĕ.
Каламалла, Лабиновсен ветеринари медицининчи пĕрлехи стажĕ 1464 çулпа танлашать. Ку ĕçе çемьен 49 членĕ хăйĕн пурнăçне халалланă.
Династие пуçарса яраканĕ – Павел Гаврилович. Мĕнпур ултă ăру ашшĕ çулне – ветеринарие суйласа илнĕ. Ветеринари наукисен докторĕ Виталий Павлович Лабинов профессор, чылай вăхăт Саранскри патшалăх университечĕн кафедра доцентĕнче, Чăваш патшалăх ял хуçалăх академийĕнче вăй хунă. Унăн виçĕ ывăлĕ ашшĕ çулĕпе кайнă. Асли, Владимир Витальевич, ял хуçалăх наукисен кандидачĕ, Раççей Федерацийĕн патшалăх советникĕ. Зоотехникре, зоотехник-селекционерта, технологра ĕçленĕ. Халĕ – Раççей ял хуçалăх министерствин выльăх-чĕрлĕх тата ăратлăх ĕçĕн департаменчĕн директорĕ.
Алексей Павлович ахаль ветврачран Чăваш Республикин ял хуçалăх министерствин ветеринари пайĕн пуçлăхĕ таран ÿснĕ. Чăваш Республикин тава тивĕçлĕ ветеринари врачĕ.
Николай Павлович Йĕпреç районĕн тĕп ветеринари врачĕ пулнă, 70 çул тултариччен Вăрнарти ял хуçалăх техникумĕнче тăрăшнă.
Галина Павловна хамăр районта ветучастока ертсе пынă.
Илья Павлович чылай çул Шупашкар районĕнчи «Гвардеец» колхоза ертсе пынă.
Сочири чыслава хутшăннă Аркадий Павлович районта 40 çул ветеринари врачĕ пулса тимленĕ.
Пĕтĕм çĕршывĕпех палăрнă Лабиновсен ветеринари династийĕ чи пысăкки. Конкурс призерĕсен – Кироври Соболевсен пĕтĕмĕшле стаж икĕ хут сахалтарах: 673 çул, 25 çынна пĕрлештерет; Тутарстанри Тарутинсен 482 çул ытларах, династире 17 çын.
Светлана ЧИКМЯКОВА.