10 апреля 2016 г.
Ытти чухне педагогсен пысăк йышне августри конференцире, Учитель кунĕнче çеç пĕрле курма май килетчĕ. Халĕ пухăнма тата тепĕр сăлтав пур – иккĕмĕш çул ĕнтĕ вĕсем хорпа юрлассипе тупăшаççĕ.
Юнкунхи пултарулăх кĕрешĕвĕ тата хавхалануллăрах иртрĕ. Районта ĕçлĕ визитпа пулнă май, педагогсене Шупашкар хула пуçлăхĕ, республикăри муниципаллă пĕрлĕхсен Канашĕн правленийĕн председателĕ Леонид Черкесов, асăннă канашăн ĕç тăвакан директорĕ Станислав Николаев тата Вăрнар район администрацийĕн пуçлăхĕ Леонид Николаев саламларĕç.
Хор конкурсĕн темине залри учительсен хăш-пĕр коллективĕн тумĕсенчен те палăртма май пулчĕ. Номерсене йăлтах Раççей киновĕн тата ,ç çыннин çулталăкĕсене халалланă.
Леонид Николаев вăрнарсен педагогика ĕçĕнчи маякĕсемпе мухтанмалăх пуррине палăртрĕ. «Çулталăк вĕрентекенĕ», «Самый классный классный» республикăри конкурссен çĕнтерÿçисем, лауреачĕсем районти шкулсенче ĕçлеççĕ% Татьяна Сапожникова, Ольга Физер, Наталья Самарина...
Шупашкар хулин пуçлăхĕн учительсем патне уйрăм чыс. Унăн амăшĕ ку тытăмра 40 çул ĕçленĕ. Леонид Черкесов çакнашкал мероприятисем педколлектива уйрăмах пĕтĕçтернине, ачасене хавхалантарма пултарнине палăртрĕ.
Станислав Николаевăн та амăшĕ педагог. Вăл 90-ран иртнĕ. Уншăн çеç мар, учительсене вăл яланах сума сунă.
Хăнасем зала пухăннисене творчествăра çеç мар, пĕтĕмĕшле ĕçре ăнăçу сунчĕç. Хисеп хучĕсем тыттарнă май, «Çулталăк вĕрентекенĕ», «Самый классный классный», «Çулталăк воспитателĕ», «Чи лайăх социаллă педагог» конкурссен районти тапхăрĕнче çĕнтернисенчен – Санарпуç шкулĕнчи историкрен Денис Трофимовран, Вăрнарти 1-мĕш шкулти кĕçĕн классен учителĕнчен Нина Бурмистроваран, поселокри «Рябинка» ача сачĕн музыка ертÿçинчен Ольга Стекловаран тата Пăртасри социаллă педагогран Ольга Захароваран тĕслĕх илмеллине палăртрĕç.
Район администрацийĕнче район активĕпе ирттернĕ тĕлпулура Леонид Черкесов патне чылай ыйту пулчĕ. Владимир Сергеев депутат вăрнарсемшĕн çивĕч проблема пулнине шута илсе Шупашкар хулин пуçлăхĕ çул-йĕр тăвассипе республикăри хăш предприятие шанма май пуррине ыйтрĕ. Леонид Ильич асăннă пысăк фирмăсем, шел те, муниципалитетсен шайĕнче ĕçлемеççĕ. Анчах та Чăваш енре ĕçлекенсем хушшинче те тÿрĕ чунлă подрядчиксем пур, терĕ вăл. «Чувашавтодора» критиклерĕ, юлашки çулсенче кунти ертÿлĕх тăтăш улшăнни, лайăх специалистсене ĕçрен кăларни те предприяти чылай объекта вĕçне çитерейменнипе, пахалăхсăр пурнăçланипе çыхăннине пĕлтерчĕ. «Паянхи пурнăçра кирек ăçта та профессионаллă специалистсене сыхласа хăварма тăрăшмалла», – терĕ вăл.
Леонид Ильич çавăн пекех пахалăхсăр ĕçлекен подрядчиксен шутне аукционсенче çĕнтерекен пĕр кунлăх фирмăсене те кĕртрĕ.
Тĕлпулу ырă самантсемпе вĕçленчĕ. Леонид Черкесовпа Леонид Николаев Шупашкар хулипе Вăрнар районĕ социаллă экономика, культурăпа спорт сферинче пĕрлешсе ĕçлесси пирки килĕшĕве алă пусрĕç.
Вырăнти хăй тытăмлăх органĕнчи курăмлă ĕçсемшĕн Кульцав тата Мăн Явăш ял тăрăхĕсен пуçлăхĕсене Евгений Нараткина тата Андрей Васильева, Малти Ишек тата Ершепуç ял тăрăхĕсен специалист-эксперчĕсене Татьяна Самолетована тата Галина Измакована Чăваш Республикин муниципаллă пĕрлĕхĕсен Канашĕн грамотисемпе, Калининăри культура çурчĕн ертÿçине Елена Мышкинана тата «Энергостроймонтаж» ТМЯО директорне Рифкат Киметова «Единая Россия» партин регионти уйрăмĕн Тавĕпе чысларĕç.
Светлана ЧИКМЯКОВА.