16 апреля 2016 г.
Чăваш ен Пуçлăхĕ Михаил Игнатьев Вăрнарта районăн социаллă пурнăçĕпе экономика аталанăвĕн пĕтĕмлетÿллĕ пухăвне хутшăннă май (февралĕн 16-мĕшĕ), халăх чылай ыйту çĕкленĕччĕ. Пĕр ыйтăвĕ «Калинино салинче ачасем валли нимĕнле секци-кружок та ĕçлемест» тенипе çыхăннăччĕ.
Ку ыйтăва уçăмлатас тата халăха районта хушма вĕрентÿ тытăмĕ еплерех ĕçленине пĕлтерес тĕллевпе район администрацийĕн вĕрентÿпе çамрăксен политикин пайĕн пуçлăхĕпе Маргарита Николаевна Тихоновапа курса калаçма тÿр килчĕ.
– Калинино ачисем валли нимĕнле кружок-секци те ĕçлемест тени тĕрĕс мар. Кунти шкул хăех темиçе направленипе ĕçлет, спорт секцийĕсем анлă сарăлнă. Культура çуртĕнче те çитĕнекен ăрăва аталанма майсем пур. Çитменнине, Калинино шкулĕнче Вăрнарти ача-пăча ÿнер шкулĕн художество уйрăмĕн филиалĕ ĕçлет, – пĕлтерчĕ Маргарита Николаевна.
Çак сăмахсенех Калинино шкулĕн директорĕ Татьяна Ефимова та çирĕплетрĕ. Ачасен ÿкерчĕкĕсем «Хавхалану студийĕ» стендсенче вырăн тупнă. Çавăн пекех салана кĕçĕннисене шашка-шахмат ăсталăхне вĕрентме Вăрнартан преподаватель çÿрет.
Ÿнер шкулĕн подразделенийĕсене çавăн пекех Хапăсри, Пăртасри, Кÿстÿмĕрти шкулсенче те йĕркеленĕ.
Районта хушма вĕрентÿ тытăмĕ çирĕп аталаннă. Ача-пăча пултарулăх çуртĕнче, ÿнер шкулĕнче тата ачасемпе çамрăксен спорт шкулĕнче кăмăл туртăмне кура 138 пĕрлешÿ ĕçлет. Вĕсене паянхи кун тĕлне 1928 ача çÿрет. Виçĕмçул уçăлнă «Кристалл» пăр катокĕнче хоккей, фигурăллă ярăну секцийĕсене шкул çулĕнчисем аван кăмăлланă. Ача-пăча пултарулăх çурчĕн пĕрлешĕвĕсен филиалĕсем тăхăр шкулта тухăçлă ĕçлеççĕ. Аçăмçырминчи çамрăк инспекторсем ав çулсерен республикăра çĕнтерĕве алăран ямаççĕ, вĕсем – «Хăрушсăр кустăрма» акцин Раççей призерĕсем те.
Мăн Явăш ачисем космонавтикăпа тарăннăн кăсăкланаççĕ. Вăрнарти 2-мĕш шкулта çĕнĕ направление – роботехникăна алла илнĕ, ку енĕпе нумаях пулмасть ачасем республика конкурсĕнче те япăх мар тупăшрĕç. Пăртас ачисем те, «Экодозор» уйрăмне çÿрекенсем, – республика шайĕнче ырă ятра.
Ÿнер тата спорт шкулĕсене çÿрекенсен çитĕнĕвĕсене каласа пĕтерме те çук. Юрлассипе те, ăмăртассипе те Вăрнар ачисене тăтăшах çĕнтерÿçĕсен йышĕнче курма пулать.
Районĕпе илес пулсан, хушма вĕренÿ программипе 5–18 çулсенчи ачасен 57,83 проценчĕ аталанать.
Район администрацийĕн вĕрентÿпе çамрăксен политикин пайĕн пуçлăхĕ Маргарита Тихонова пĕлтернĕ тăрăх, кăçал ача-пăча пултарулăх çурчĕн филиалĕсене çавăн пекех Кÿстÿмĕрти, Çĕрпелти, Санарпуçĕнчи тата Туçи Мăратри шкулсенче уçма палăртнă. Спорт шкулĕн секцийĕсем Пăртасри тата Малти Ишекри шкулсенче, физкультурăпа спорт комплексĕ тата пăр катокĕ çумĕнче ĕçлеме пуçлĕç.
Районта хушма пĕлÿ тытăмĕ çирĕп. Тĕрлĕ енлĕ аталанма ан ÿркен кăна...
Светлана ЧИКМЯКОВА.