16 апреля 2016 г.
Уяв умĕн Раççей Шалти ĕçсен министерствин районсем хушшинчи «Вурнарский» пайĕн ветерансен Канашĕн председателĕ хисеплĕ ветеранпа Федор Григорьевич ВОШНЯЕВПА тĕл пулса калаçрĕ.
Федор Григорьевич 1933 çулта Кÿлхĕрринче çуралнă. Ачалăхĕ унăн вăрçă хыççăнхи йывăр çулсенче иртнĕ.
Вĕренÿ хыççăн «Трактор» колхозра ĕçленĕ. 1953 çулта Совет çарне илнĕ, службăна Минскра, Брестра ирттернĕ. 3,5 çултан тăван тăрăха таврăнсан Вăрнарти шалти ĕçсен пайне вырнаçма шут тытнă.
– Пайра шофер-милиционер должноçе кĕртнĕ. Унта вырнаçас текен вунпĕр çынна медкомиссие янă, анчах пĕри те тивĕçлĕ пулман. Эпĕ комиссие тĕрĕс-тĕкел тухрăм. Пая брезентлă ГАЗ-69 машина пачĕç. Эпĕ милицин пĕрремĕш машинин пĕрремĕш шоферĕ пулса тăтăм. Ку вăхăтра пайра тăватă лаша шутланатчĕ. Пай пуçлăхĕ – Никита Васильевич Васильев. Службăра 16 çын% пай пуçлăхĕ, уголовлă шырав сотрудникĕ, дознаватель, ОБХСС ĕçченĕ, пушарник, паспортист, шофер, секретарь-бухгалтер, пилĕк участковăй, конюх тата уборщица. Канмалли, уяв кунĕсем пулман. Каçсерен мĕнпур фермăна, лавккасене пăхса çаврăнаттăмăр, сăмакунçăсене шыраттăмăр, – аса илет Федор Григорьевич.
1962 çулта Ф.Вошняева Ленинградри милицин аслă шкулне вĕренме янă. Курссене пĕтерсен ăна çул-йĕр асăрхавĕн инспекторне çирĕплетнĕ. Ку çулхине районта паллă событи пулнă – СССР виççĕмĕш космонавчĕ, Совет Союзĕн Геройĕ Андриан Николаев килнĕ. Ăна кĕтсе илме Ф.Г.Вошняев та хутшăннă.
Паспорт сĕтелĕн пуçлăхĕнче Борис Федотович Федотов тăрăшнă. Федор Григорьевич пушă вăхăтра ăна документсене йĕркелеме пулăшнă. Ун тăрăшулăхне тата пĕлĕвне кура Борис Федотович çÿллĕрех ĕçе куçсан Федор Григорьевича хăй вырăнне сĕннĕ. Ветеран унта 1967 – 1969 тата 1978 – 1981 çулсенче ĕçленĕ.
1969 çулта дежурнăй-инспектор должноçне куçараççĕ. 1974 çулхи октябрьте районта суту-илÿ точкисене çаратнă тĕслĕхсем чылай пулнă. Çав преступленисене тăвакансене тытса чарнăшăн Ф.Г.Вошняева ЧАССР Ш,М-н хушăвĕпе укçан хавхалантарнă.
1983 çулччен медицина урăлтаркăчĕн пуçлăхĕнче тăрăшнă. Шалти ĕçсен службинчи пĕтĕмĕшле стаж 26 çула яхăн. Ведомство медалĕсемпе, Хисеп грамотисемпе наградăланă.
Федор Григорьевич паян та хастар, хуçалăх тытса пырать, пахча ÿстерет. Мăшăрĕпе, Юлия Андреевнапа, 58 çул пĕрле. Икĕ хĕрпе пĕр ывăл çитĕнтернĕ. Халĕ вĕсен виçĕ мăнук тата тăватă кĕçĕн мăнук.
Сăмах май, шалти ĕçсен органĕсен ветеранĕсене пурне те уявпа саламлатăп. Çирĕп сывлăх, вăрăм кун-çул, телей сунатăп.
Л.ЗАБИРОВА,
полицин «Вурнарский» пайĕн пуçлăхĕн помощникĕ.