09 апреля 2016 г.
Юнкун Вăрнарти пăр катокĕ каллех çамрăк хоккеистсене йышăнчĕ. Хальхинче кунта «Ылтăн шайба» республика первенствин «Надежда» Кубокĕн финалĕ пулчĕ.
Вăрнар хоккеисчĕсем, кĕçĕн çулхисем, ку турнирăн январьте иртнĕ тĕп вăййисенче 17 команда хушшинче вăй виçнĕччĕ. Анчах та сакăр çĕнтерÿпе те вĕсем финала тухайманччĕ – 5-мĕш вырăн йышăннăччĕ.
Шанăç кубокĕнче вара вĕсем хăйсене туллин кăтартма пултарчĕç. Килти финалта акă вĕсем чи маттуррисем пулса тăчĕç. Николай Старостин тренер ку командăри ачасем пысăк шанăç хунине, хăшĕсем хоккейпа çав тери вăйлă «чирленине» палăртрĕ. Иккен, Шупашкарта «Спартакпа» вылянă вăхăтра вăрнарсен хăш-пĕр вылявçине ку комадăна та чĕннĕ. «Паллах, илĕртÿллĕ йыхрав. Анчах та унта ачасен хăйсен тĕллĕн çитмелле-çке», – пĕлтерчĕ тренер.
Николай Старостин Никита Тинюков, Саша Ванин, Дима Иванов пултаруллă вылянине асăнчĕ.
«Надежда» кубок финалĕ вăтам ÿсĕмрисемшĕн те ăнăçлă иртрĕ. Сергей Январевăн воспитанникĕсем çĕмĕрлесене 7:0 шутпа парăнтарчĕç.
Аслăрах ÿсĕмри каччăсем те çĕмĕрлесемпе тĕл пулчĕç. Виçĕ тапхăр хыççăн икĕ командăн та очкосем танлашрĕç – 2:2. Шел, буллитра вăрнарсен вратарĕ хапхана япăхрах сыхларĕ, икĕ шайбăна ирттерчĕ. Çапла «Кристалл» иккĕмĕш вырăнпа çырлахрĕ.
Спортсменсене дипломсемпе, кубоксемпе чысланă май, район администрацийĕн пуçлăхĕн заместителĕ Андрей Матвеев хоккейпа чăн-чăн арçынсем туслашнине, çакнашкал ăмăртусем тата та сумлăрах турнира çул уçнине палăртрĕ.
«Единая Россия» проекчĕпе çĕкленнĕ спорт объекчĕ уçăлнă хыççăнхи çулталăк çурăра вуншар ачана хоккея суйласа илме пулăшрĕ. Хĕрÿ вăйăсене пăхнă хыççăн секцине çырăнакансем те чылаййăн иккенне палăртрĕ Николай Старостин.
Светлана ЧИКМЯКОВА.