06 апреля 2016 г.
Эрнекун Чăваш Республикин çутçанталăк ресурсĕсен министрĕ Сергей Павлов, «Чувашхлебопродукт» акционерлă обществăн генеральнăй директорĕ Владимир Яковлев районта ĕçлĕ визитпа пулнă май поселокри «Ромашка» ача сачĕн 50 çулхи юбилей уявне хутшăнчĕç.
Пултаруллă, мал опытлă, пуçаруллă педагог Ирина Антонова ертсе пыракан ача сачĕ юлашки çулсенче пысăк çитĕнÿсем тăвать. Çавна май 50 çул тултарнă ятпа район администрацийĕ кÿнĕ парнен сумĕ те пысăк. Леонид Николаев пуçлăх çĕнĕ машина уççине садик ертÿçине тыттарнă май, малашне тата кăтартуллăрах ĕçлеме сунчĕ. Шкул çулĕчченхи вĕренÿ çыннăн пуçламăш тата тĕп пĕлÿ никĕсĕ пулнине палăртрĕ.
ЧР çутçанталăк министрĕшĕн ку учреждени ют мар. Унăн, хăй районта ĕçленĕ вăхăтра, икĕ ывăлĕ те кунта çÿренĕ. Сергей Владимирович воспитатель ĕçĕн кирлĕлĕхне, пĕлтерĕшне асăнчĕ, шăпах вĕсем ачасенче çынлăха хывас ĕçе çирĕппĕн пурнăçланине каларĕ.
Владимир Яковлевпа пушă алăпа килмен вĕсем – пылесос садикшăн çав тери кирлĕ япала.
Уява кашни ушкăнри ачасен юрри-ташшипе, воспитательсен пултарулăхĕпе илемлетни кăмăлсене çĕклерĕ çеç мар, ачалăха тавăрчĕ, кунти кашни воспитатель кашни ачапа чуна парса ĕçлени курăнчĕ. Юбилярсемпе пĕрле ветерансем те чĕререн савăнчĕç.
50 çул кăтартусене пĕтĕмлетме те май пачĕ. Чи-чи пултаруллисем официаллă çынсен аллинчен тĕрлĕ шайри наградăсене тивĕçрĕç: Чăваш Республикин вĕрентÿпе çамрăксен политикин министерствин Хисеп грамотине – Валентина Коновалова тата Елена Савельева воспитательсем, Нина Ярчеева музыка руководителĕ, Юлия Петухова повар* район администрацийĕн Хисеп грамотисене – Елена Савельева воспитатель, Марина Никишова физкультура инструкторĕ тата Владислав Зайцев водитель, Тавне – «Ромашка» ача сачĕн 1985 – 2010 çулсенчи ертÿçи Светлана Николаева.
Юбилярсене ку ача садĕнчен тухнă, халĕ Шупашкар хулин вĕрентÿ управленийĕн пуçлăхĕ Елена Сахарова та саламларĕ. Район администрацийĕн вĕрентÿпе çамрăксен политикин пайĕн пуçлăхĕ Маргарита Тихонова Анжелика Кротова тата Людмила Гаврилова воспитательсене, Татьяна Попова кĕçĕн воспитателе грамотăсемпе чысларĕ.
Залра ачалăх туйăмĕ хуçаланчĕ. Кашнин тенĕ пек аллинче садик ятне символлакан шур чечексем пулчĕç. Уяв воспитательсен гимнĕпе вĕçленчĕ.
Светлана ЧИКМЯКОВА.