06 апреля 2016 г.
Çак сăлтав иртнĕ эрнере Вăрнарти 59-ти арçыншăн пурнăç хакне те тăма пултарнă.
Верандăра чĕлĕм туртнă та вăл тĕпне сÿнтересси пирки маннă. «Хĕрлĕ автан» хăвăрт пуçне çĕкленĕ – çурта çулăм çавăрса илнĕ. Арçын, сĕрĕм газĕпе наркăмăшланнăскер, урама аран тухма ĕлкĕрнĕ.
Маларах, мартăн 22-мĕшĕнче, çурçĕр иртни 3 сехет те 30 минутра Кÿстÿмĕрти 57-ри арçын килне вут хыпса илнĕ. МЧС сотрудникĕсем пушар йăлари электроприборсемпе тĕрĕс мар усă курнинчен тухма пултарнине палăртаççĕ.
Çулăм термопотпа микроволновкă çумĕнчи сĕтел-пукана ярса илнĕ. Кил хуçи хĕрарăмĕ çакна асăрхаса мăшăрне вăратса урама чупса тухнă, пушарнăйсене чĕнсе илнĕ. МЧС сотрудникĕсем мунчана, хуралтăсене сыхласа хăварнă. Шел, пурăнмалли çурт тĕппипе кĕлленнĕ.
Мартăн 26-мĕшĕнче 19 сехет те 8 минутра МЧС пульчĕ çине Çарăклăра мунча çунни пирки пĕлтерÿ килнĕ. Вут-çулăм стена çумĕнче çывăхра ларнă кăмакаран тухнă. Пушар мунчана тĕп тунă, пурăнмалли çурт тăррине сиенленĕ. Инкекпе МЧСăн сакăр сотрудникĕ тата икĕ пушар машини кĕрешнĕ, çулăма ытлашши сарăлма паман.
Çак кунах тепĕр вунвиçĕ минутран пушар рассчечĕн Вăрнарти Комсомольски урамри 17-мĕш çурта тухса кайма тивнĕ. Кунта пурăнмалли пÿрт çунма тытăннă.
– Пушар çулталăкăн кирек хăш тапхăрĕнче те хăрушă. Вăл ниме те, никама та хĕрхенмест, çавăнпа та йăлари приборсемпе, электричествăпа, кăмакасемпе усă курнă, мунча хутнă чухне тимлĕх пирки нихăçан та ан манăр! – асăрхаттарать Вăрнарти 27-мĕш пушар чаçĕн пуçлăхĕ Владимир Афиногентов.
С.СВЕТЛОВА.