02 апреля 2016 г.
Пурăннă пулсан мартăн 28-мĕшĕнче манăн пичче Леня 85 çул тултаратчĕ. Шел пулин те вăл 2009 çулхи декабрĕн 29-мĕшĕнче пурнăçран уйрăлса кайрĕ. Халь асаилÿсем кăна юлчĕç. Куç умĕнчех унăн иртсе кайнă йывăр кун-çулĕсем. Вăл маншăн пичче кăна мар, аттепе анне вырăнĕнче те пулнă. Пурнăç çулĕ çине тăма пулăшнă. Пысăк пĕлÿллĕ инженер-электрик пур енпе те пултарулăхĕпе палăрнă. Мăньял Хапăсран 1931 çулта пирĕн атте-аннене тата вĕсен ачисене кил-çуртран хăваласа кăларса янă, çавăнпа мунчара пурăнма тивнĕ. Колхоз тăватпăр тесе вĕсен пурлăхне туртса илнĕ. Аттене тĕрмене хупнă.
1941 çулта, вăрçă пуçлансан, çемьере 8 ача пулнă. Архивран илнĕ справка тăрăх, пичче 10 çулта аслисемпе тан ĕçленĕ, Мăньял Хапăсри шкулта 4 çул вĕреннĕ. Канашри училищĕре шофер-водитель специальноçне алла илет. МТСра шофер-водительте тăрăшса ĕçлет. Унтан райкома инструктора илеççĕ. Салтака кайма вăхăт çитет. Çартан таврăнсан Ленинградри институтăн инженери факультетне куçăмсăр майпа вĕренме кĕрет. Çав вăхăтрах ялта клуб заведующийĕнче те, колхозра электромонтерта та ĕçлет. Хыççăн Шупашкарти электроаппаратура заводĕнче инженер-электрикра, цех мастерĕнче, каярахпа бюро начальникĕнче тимлет. 1991 çулта пенсие тухать. Аслă пĕлÿ илнĕ. Маншăн Леня пичче ырă тĕслĕх пулнă.
Эпĕ ăна яланах хисепленĕ, юратнă, вăл каланине итленĕ. 1953 çулта, 7-мĕш класс пĕтерсен, эпĕ колхозра весовщицăра ĕçлерĕм.
Çамрăклах техникăна юратнăскер, хăйне валли мотоцикл евĕрлĕ чупакан япала пуçтарнă Леня пичче. Пенсие тухсан 18 çул пурăнчĕ. Мунча, гараж, сарай – веçех хăй аллипе турĕ.
Эмма МАЛОВА.