02 апреля 2016 г.
Нумаях пулмасть хаçат редакцийĕнчен инçех те мар вырнаçнă пĕр лавккана кĕрсен икĕ çын хыттăн калаçнине илтрĕм. Шăв-шавпа хăлха хупланса ларатчĕ пулĕ. Пĕр çамрăк хĕр тавар туянакансен правине пăсатăн тесе сутуçа айăпларĕ, ăна явап тыттарассипе хăратрĕ. Вăл хăйне эрех сутманшăн хытах кăмăлсăрланчĕ. Сутуçă çамрăкран паспорт кăтартма тепĕр хут ыйтрĕ. «Эпĕ вунçиччĕре мар, çирĕм виççĕре ! Çавах паян эрех туянăп!» – тесе хаяррăн кăшкăрнă хыççăн хĕр алăка хыттăн шалтлаттарса хупрĕ те тухса кайрĕ. «Ку çамрăка ашшĕ-амăшĕ аслă ăрурисене хисеплеме, сывă пурнăç йĕркине пăхăнма вĕрентмен курăнать»,– терĕ пĕр старик. Ман умĕн черетре тăракан хĕрарăм çапла хушса хучĕ:
– Пĕрре 30 çулти хĕрĕм те çакăн пек лару-тăрăва лекнине каланăччĕ. Анчах та вăл паспорт кăтартма ыйтсан питĕ хĕпĕртенĕ. Çула çитмен çамрăксен йышне кĕртни хĕрĕме хăпартлантарса янă.
Хĕр сутуçăпа хĕрсе кайса тавлашнине мĕнле ăнлантарма пулать-ха? Ахăртнех, вăл 18 çула çитмен. Лавккара ĕçлекен тупăш илессишĕн эрех-сăрана çула çитменнисене те сутĕ тесе шутланă ĕнтĕ хĕр. Анчах пур ĕçчене те пĕр виçепе виçеймĕн. Йĕркелĕхшĕн тăрăшакансем, саккуна пăхăнакансем сахал мар вĕсем.
Пĕтĕм тĕнчери сывлăх сыхлавĕн организацийĕн кăтартăвĕсем чуна çÿçентереççĕ. Экспертсем палăртнă тăрăх, тĕнчере кашни çулах алкогольлĕ шĕвексене ĕçсе 2,5 миллион çын пурнăçран вăхăтсăр уйрăлать. Çав йышран 320 пинĕшĕ – 15 çултан тытăнса 29-а çитмен çамрăксем.
Иккĕленÿ пулсан сутуçăн паспорт ыйтма право пур. Тавар туянакансем пурте лавккара ĕçлекен майлă пулчĕç. Çамрăка киревсĕр хăтланăвĕсемшĕн питлерĕç. Яш-кĕрĕмпе хĕр-упраçăн эрех-сăрапа мар, спортпа туслашмалли çинчен калаçрĕç.
Елена ПОРФИРЬЕВА.