02 апреля 2016 г.
Иртнĕ эрне культура ĕçченĕсемшĕн паллă кунсемпе асра юлчĕ: 25-мĕшĕнче культура ĕçченĕсен, 27-мĕшĕнче театр кунĕсене паллă турĕç. Çак уявсем ячĕпе Уйкас Кипекри культура çурчĕн ертÿçи Лидия Михайлова ертсе пыракан ушкăн куракансем умне Н.Айзман çырнă «Çÿпçипе хупăлчи» камите кăларчĕ.
Уйкас Кипекри культура çуртне куракансем тулли пуçтарăнни вырăнти артистсен кăмăлне те уçрĕ. Сăнарсене калăплакансем: Верук – Надежда Назарова, Кулине – Лидия Михайлова, Алтатти – Светлана Авакумова, Хветĕр – Елена Егорова. Вĕсем камитри самантсене чăн пулнă пек сăнласа пачĕç. Рольсене вылякансем чăннипех те куракансене тыткăнлани вĕсем тăвăллăн алă çупнинчен тата самантăн-самантăн ахăлтатса кулса янинчен пăлăрса тăчĕ. Камите туй йĕркипе вĕçлени пысăк пĕлтерĕшлĕ пулчĕ. Сцена çинче чăн-чăн чăваш туйĕ вылярĕ. Галина Данилова, Ольга Осипова, Людмила тата Юлия Христофоровасем, Галина Петрова, Надежда Назарова илемлĕ юрри-ташшипе тыткăна илчĕç. Купăсçи, Владимир Арсентьев, чăннипех пултаруллă. Камит вĕçленсен Уйкас Кипекре пурăнакан Л.Давыдов халăх умне тухса çапла каларĕ: «Уйкас Кипекри культура вучахĕ нихăçан та ан сÿнтĕр, яланах ялкăшса çунса тăтăр».