26 марта 2016 г.
Граждансен обществин аталанăвĕн фончĕ кĕпĕрнаттăрсен ĕç тухăçлăхĕн рейтингĕн вунвиççĕмĕш кăларăмне хатĕрленĕ. Фонд эксперчĕсем палăртнă тăрăх – Чăваш ен Пуçлăхĕ Михаил Игнатьев хăйĕн позицине 2 пункт (7 балл) – лайăхлатнă, иккĕмĕш ушкăнри – «Пысăк рейтинг (7–55 балл)» – позицине упраса хăварнă. Çапла вара вăл Брянск облаçĕн кĕпĕрнаттăрĕпе А.В.Богомазпа пĕрле 32–33-мĕш вырăнсене йышăнать.
Рейтинг методикине пилĕк тематика модулĕ çинче никĕсленĕ. Ку хутĕнче пуçласа РФ субъекчĕсен социаллă пурнăçпа экономика лару-тăрăвĕн модулĕпе те усă курнă. Экспертсем регионăн пĕтĕмĕшле продукчĕн, унăн кашни çын пуçне тивекен калăпăшне, промышленноç производствин ÿсĕмне, вăтам ĕç укçин шайне, вăтам шалупа «потребитель карçинккин» шайлашăвне те хакланă.