26 марта 2016 г.
Юнкун районти выльăх-чĕрлĕх чирĕсемпе кĕрешекен станцире техник-осеменаторсен, ветеринарсен, зоотехниксен семинар-канашлăвĕ иртрĕ. Унта ветеринари службин ĕç-хĕлне, районта выльăх-чĕрлĕх отрасльне аталантарассипе мĕнле тăрăшнине пĕтĕмлетрĕç, кĕтĕве çĕнетессине пысăк тимлĕх уйăрмаллине палăртрĕç тата ытти ыйтăва тишкерчĕç.
,мĕр пурăн, ĕмĕр вĕрен тесе ахальтен каламаççĕ. Район администрацийĕн пуçлăхĕн пĕрремĕш заместителĕ – ял хуçалăхĕпе экологи пайĕн пуçлăхĕ Вячеслав Горбунов семинар-канашлусем ирттерни пĕлĕве тарăнлатма, мал опытпа паллашма пулăшнине çирĕплетрĕ. Ял хуçалăх специалисчĕсене професси ăсталăхне ÿстерсе пархатарлă ĕçре пысăк çитĕнÿсем тума сунчĕ.
Пуш уйăхĕн 1-мĕшĕ тĕлне мĕн пур тытăмри хуçалăхсенче мăйракаллă шултра выльăх-чĕрлĕх 16669 пуç шутланать, çав шутран 7927 ĕне, 16921 сысна. Ял хуçалăх предприятийĕсенче кăтартусем çапларах: пĕтĕмпе мăйракаллă шултра выльăх-чĕрлĕх 6412 пуç, çав хисепрен 2666 пуç ĕне. «Чух-чухсем» – 15 пин ытла. Районти чĕрчунсен чирĕсемпе кĕрешекен станци пуçлăхĕ Владимир Матвеев ветеринари ĕçченĕсем чир-чĕр ан сарăлтăр тесе профилактика мероприятийĕсем ирттерессипе тĕллевлĕ тăрăшнине çирĕплетрĕ. Акă, сăмахран, кăçалхи икĕ уйăхра 947 пуç мăйракаллă шултра выльăха, 147 пуç качака-сурăха уртаракан чиртен вакцинациленĕ. Çавăн пекех йытăсемпе кушаксене аякра хăварман, прививка тунă.
Выльăх-чĕрлĕх отраслĕн пĕлтĕрхи тата кăçалхи ĕç кăтартăвĕсемпе район администрацийĕн ял хуçалăхĕпе экологи пайĕн тĕп специалисчĕ Георгий Романов паллаштарчĕ. Вăрнарсем сĕт, аш-какай туса илессипе, мăйракаллă шултра выльăх-чĕрлĕх, сыснасен йышĕпе республикăра виççĕмĕш вырăнта. «Пирĕн шупашкарсемпе елчĕксенчен иртсе пьедесталăн тата çÿллĕрех картлашкисем çине хăпарма тăрăшмалла»,– терĕ Георгий Павлович.
Семинар-канашлура ăратлăх енĕпе тимлекен «Чувашское» обшествăн ĕçченĕсем – пай пуçлăхĕ Леонид Решетников, Дмитрий Казаков менеджер – тата Улатăрти ветеринари станци пуçлăхĕ Петр Храмов сăмах илчĕç. Вĕсем ĕне выльăха искусствăлла майпа пĕтĕлентерессине уйрăмах пысăк тимлĕх уйăрасси, гинекологи тĕлĕшĕнчен чирлĕ выльăхсене тупса палăртасси тата сыватасси пирки тухса калаçрĕç, селекци ĕçĕ-хĕлĕнчи çĕнĕ меслетсемпе паллаштарчĕç.
Специалистсем пĕр шухăшлă: ăратлăха лайăхлатас, сывă пăрусем илес, сăвăма ÿстерес тесен ĕнесене, пушмак пăрусене искусствăлла майпа пĕтĕлентермелле. Анчах та хăш-пĕр хушма хуçалăх тытакансем самана таппипе тан пырасшăн мар, ĕне выльăха паллă мар йăхри вăкăрсемпе чуптараççĕ. Кайран хăйсемех пăру чирлĕ пулнинчен, апат начар çининчен, ÿт сахал хушнинчен хытах тĕлĕнеççĕ. Алина Языкова та, Пăртасри ветеринари участокĕн заведующийĕнче ĕçлекенскер, ĕнесене, пушмак пăрусене искусствăлла майпа пĕтĕлентерни пахалăхлăрах пулнине тĕслĕхсемпе çирĕплетрĕ. Каласа хăвармаллла, районта ĕне выльăха искусствăлла майпа пĕтĕлентерекен 12 пункт ĕçлет.
Семинар пĕтсен те специалистсем пĕр-пĕринпе чылай вăхăт канашларĕç.
Елена ПОРФИРЬЕВА.