16 марта 2016 г.
Вăрнар каччи, ачаранах спорт туризмĕпе пуçĕпех кăсăкланакан Андрей Львов кăçалхи çула спортри çитĕнÿпе пуçларĕ. Мускав тăрăхĕнче иртнĕ Раççей чемпионачĕн йĕлтĕр дистанцийĕнче вăл 11 регионти 60-а яхăн спортсмен хушшинче чи вăйли пулнăччĕ. Командăри юлташĕпе Сергей Кузнецовпа «мужская связка» тĕсре дистанцие иккĕмĕш кăтартупа вĕçленĕччĕ.
Çĕнĕ Шупашкарти «Кредо» спорт клубĕн членĕсем – Раççей спорт мастерĕсем – çак кунсенче тата тепĕр ăмăртура палăрнă. Андрей Львовпа Сергей Кузнецов Свердловск облаçĕнчи «Зеленый мыс» спорт базинче «Европа – Ази» акци йĕркипе иртнĕ Раççей первенствинче пĕрлехи çыхăнура ылтăн медаль çĕнсе илнĕ. Иккĕмĕш кунне Вăрнар каччи ушкăнла йĕлтĕр чупăвĕнче Сергей Кузнецовпа, Семен Машановпа тата Андрей Беловпа пĕрле дистанцие иккĕмĕш вĕçленĕ.
Андрей Львов спорт туризмĕн пĕрремĕш утăмĕсене ачасемпе çамрăксен Вăрнарти спорт шкулĕнче тунă. Пĕр вăхăтрах хавхалантараканĕ, вăл вăхăтри тренерĕ – ашшĕ, Владислав Львов.
Спорт туризмĕ енĕпе «Раççей спорт мастерĕ» ята Андрей Чăваш Республикинчен чи малтан илнĕ. Ку тĕсĕн çуран тата йĕлтĕр дистанцийĕсенче – Чăваш Республикин тата Марий Эл Республикин, Раççей Кубокĕн, Пĕтĕм Раççейри ăмăртусен нумай хутченхи чемпионĕ тата призерĕ. 2010 çулта вăл Эльбрус тăвĕ çине хăпаракансен йышне кĕме те тивĕçнĕччĕ.
Çак кунсенче Вăрнар спортсменĕсем ытти тупăшусенче те палăрчĕç. Дима Львов Ульяновскра иртнĕ Пĕтĕм Раççейри турнирта ылтăн медаль çĕнсе илнĕ.
Вăрнар çамрăкĕсем Йĕпреç районĕнчи Киря поселокĕнче Чечня вăрçинче пуç хунă Сергей Судакова асăнса ирттернĕ волейбол турнирĕнче пĕрремĕш вырăн йышăннă.
Светлана ЧИКМЯКОВА.