27 февраля 2016 г.
Чăрăшкас Хирлепри культура çурчĕ çывăхĕнчен пĕрре мар иртсе кайнă, анчах та кĕрсе курманччĕ. Акă тинех май килчĕ. Культура çурчĕн директорĕ Ольга Ефремова ăшă кăмăлпа кĕтсе илчĕ. Малтанах музей пÿлĕмĕн алăкне уçрĕ.
Культура ĕçченĕ тĕрлĕ экспонатсемпе паллаштарчĕ. Стендри сăнÿкерчĕксене курма сĕнчĕ. Кунта ку тăрăхри вăрçă паттăрĕсем вырăн тупнă. Зала кĕтĕмĕр. Сцена пысăк. Ларма пукансем çителĕклĕ. Залрах сĕтелçи теннисĕн вăййине, бильярдла выляма пулать. Çавăнпах çамрăксем культура çуртне килсе çÿреççĕ, пушă вăхăтра спортпа туслашаççĕ. Вĕсемшĕн алăк яланах яриех уçă. Аслă çулсенчисем те кĕтнĕ хăна вырăннех-мĕн.
Анчах та Чăрăшкас Хирлепри культура çуртĕнче каçсерен çынсем пур-ши е пушах ларать-ши вăл? Шалта капланнă ыйтăва пытарма пултараймарăм.
– Культура çуртĕнче пĕр-пĕр мероприяти ирттерес пулсан ял çыннисене чĕнсе çÿрес йăла çук, хăйсемех вăхăтра пуçтарăнаççĕ. Çакă мана чăннипех те савăнтарать, – пĕлтерчĕ директор.
Драма кружокĕ иккĕ. Çапла, ан тĕлĕнĕр, пĕрне аслă çулсенчисем, теприне шкулта вĕренекенсем çÿреççĕ. Ольга Ефремова режиссер тивĕçне те пурнăçлать. Çавăнпа та унăн сцена çине спектакль кăларассипе те ĕçлеме тивет. Ачасемпе кăнтăрла иртсен репетици ирттерет пулсан, аслисемпе каçхине.
Пĕлтĕр В.Петров çырнă «Кин кĕртесси çăмăл мар» камите куракан умне кăларнă. Спектакле куракан ăшшăн йышăннă, кулмалли самантсем нумай пулни, туй арăмĕсен юррисем янăрани пушшех те кăмăла хăпартлантарнă. Çавăн пекех вырăнти артистсем роле ăста калăплани те камит пахалăхне ÿстерме пулăшнă. Драма коллективне «Асамат» ят панă. Ушкăн çулсерен çĕнĕ спектакль лартать. Виçĕ çул каялла вара халăх театрĕ ятне илнĕ. «Тамăкри ача сасси» спектакль ăнăçлă пулса тухнă. Çавăнпах хисепе тивĕçнĕ. Культура ĕçченĕн пĕр-пĕр драма е камит лартма хатĕрленес умĕн çынсене шыраса хăшкăлмалла мар, курса калаçсан е кĕсье телефонĕпе пĕлтерсен пĕри те хирĕçлемест-мĕн. Пĕр сăмахпа, йыш çирĕпленсе çитнĕ, пĕри тепринчен юлмасть. Камсем-ха вĕсем, пултаруллисем? Григорийпе Светлана Семеновсем сăнара витĕмлĕ кăларма пĕлнипе палăраççĕ. Петр Моисеев, Виталий Петров, Валерий Кураков, Надежда Куракова сцена çинчи ăсталăхĕпе чыс-хисепе çĕнсе илнĕ.
Çитĕнĕвĕсем те пур – 2015 çулта районти драма коллективĕсен «Мухтав ахрăмĕ» фестивальте «Чи лайăх спектакль» номинацире мала тухнă. Çавăн пекех республикăри фестивальте те палăрнă. Дипломсем татах та пур – кашнине асăнса пĕтереймĕн. /сĕм ĕçлемесĕр пулмасть, Турă пани кирлĕ теççĕ ун пек чухне. Мĕнех калăн, Чăрăшкас Хирлепри культура çуртĕнче тимлекенсен хастарлăх хĕлхемĕ, унчченхи пекех хăватлăн ялкăшать. Акă Чăваш ен Культура министерствин грантне тивĕçни те ăнсăртран мар. Ку вăл тăрăшулăхпа çыхăннă. Нухратпа çурт тăррине, маччана тĕпрен улăштарнă, ăшăтмалли тытăма çĕнетнĕ, зала сăн кĕртнĕ. 2012 çулта яллă вырăнти культура учрежденийĕсене аталантармалли мерăсем çинчен калакан свидетельствăна тивĕçнĕ. Çавна май культура учрежденийĕ музыка аппаратури енчен самай пуянланнă.
О.Ефремова шкул хыççăн хăйĕн пурнăçне культура енĕпе çыхăнтарасси пирки шутлама та пултарайман. Вăл И.Я.Яковлев ячĕллĕ ЧППУн физикăпа математика факультетĕнче ăс пухнă. Алла диплом илнĕ хыççăн уншăн хăйĕн специальноçĕпе ĕç тупăнман. Юрать-ха Чăрăшкас Хирлепре ĕç тупма май килнĕ. Вырăнти культура çурчĕн директорĕн должноçне шанса панă. Малтанлăха шикленнĕ, анчах та пурăна-киле, çĕнĕ ĕçе хăнăхса пынă май, хăй тавра ял çыннисене пуçтарма пуçланă. Çавăнтанпа халăх канăвне йĕркелессипе пысăк тимлĕх кăтартать. Çамрăксене ăнланать, вĕсен канăвне тивĕçлипе йĕркелемешкĕн вăй-халне шеллемест. Ташă каçĕсене ирттересси яланхи йăлана кĕнĕ. Тĕрлĕ ялсенчен килеççĕ кунта, хĕрсемпе каччăсем кану кунĕсенче ташласа савăнаççĕ, вăхăта усăллă ирттереççĕ. Ольга Леонидовна ĕçе пĕччен çеç туса пымасть, ăна пулăшакансем те пур. Чăрăшкас Хирлепри культура çуртĕнче кружоксем те ĕçлеççĕ. Уяв кунĕсенче тĕрлĕ кану каçĕсем иртеççĕ. Апла пулсан культура енне ял халăхĕ туртăнма пăрахман, савăнма та, канма та пĕлет.
Юрий КОРНИЛОВ.