27 февраля 2016 г.
Тĕнчере хальхи вăхăтра питĕ кăткăс лару-тăру. Тĕрлĕ çĕршывра терроризм юхăмĕ сарăлса пырать, çамрăксене тĕрĕс çул çинчен пăрса вĕсенче аркату-вĕлерÿ туйăмĕсене ÿстереççĕ. Иртнĕ вăхăтри пулăмсене тĕрлĕрен суя улшăнусем кĕртсе çамрăк ăрăва пăтратаççĕ.
Пĕчĕкренех пулас ăрăва сывă пурнăç йĕркине ăша хывма пулăшасси, тÿрĕ чунлă та ырă кăмăллă пулма вĕрентесси, ĕçе юратма тата хăйсене тĕрĕс тытма хăнахтарасси – кашни çыннăн тивĕçĕ, явапĕ.
Пирĕн çĕршывра хальхи вăхăтра спортпа массăллă оборона уйăхлăхĕ пырать. Ăна халалласа Кайри Тукай ялĕнче те яланхи пекех спорт ăмăртăвĕсем иртрĕç.
«Совет офицерĕсен союзĕ» обществăлла организацин вырăнти уйрăмĕнчи çынсем çарта тăнă вăхăтри кунсене, Тăван çĕршыв умĕнче хăйсен тивĕçне тÿрĕ кăмăлпа пурнăçланине аса илчĕç, уяв ячĕпе ăшшăн саламларĕç, спортра тата ĕçре çитĕнÿсем тума сĕнчĕç.
Чи хĕрÿллĕ самант биатлонистсен тупăшăвĕ пулчĕ. 5 команда винтовкăран тĕл перессипе тата 2 километр йĕлтĕрпе чупассипе тупăшрĕ. Чи маттуррисем çаксем, Сергей Егоров, Денис Кириллов, Александр Семенов, Вячеслав Николаев тата Валерий Фомин.
Тепĕр ăмăртура спорта юратакансем çĕртен тытăнса çĕкленессипе тата пĕр ура çинче анса-хăпарассипе вăй виçрĕç. Юлашкинчен граната ывăтрĕç.
Çĕнтерÿçĕсене грамотăсемпе дипломсемсĕр пуçне Вăрнарсен «Туслăх» ентешлĕхĕн ертÿçи Андрей Суварин хаклă кĕнекесемпе чысласа хавхалантарчĕ.
Вăрнарти ял хуçалăх техникумĕн тирĕнче пневматикăллă винтовкăран тĕл перессипе турнир иртрĕ. Унта вĕренекенсен вуникĕ, преподавательсен виçĕ, хуçалăхри ĕçсене туса пыракансен икĕ команди хутшăнчĕç.
Кашни командăра пилĕкшер çын. Винтовкăран пилĕк хут пенинчен виççĕшĕ зачета кĕчĕ. Çак çăмăл мар ăмăртура 13-мĕш ушкăнри каччăсем, пулас автомеханиксем, палăрчĕç. Иккĕмĕшпе виççĕмĕш вырăнсене вара 12-пе 313-мĕш ушкăнри студентсем йышăнчĕç. Куç çивĕчлĕхĕпе тата пăшалпа тĕрĕс усă курас техникăна пĕлессипе Николай Скворцовпа Никита Евдокимова çитекен пулмарĕ.
Çак кăсăклă вăйăсене ирттерме «Совет офицерĕсен союзĕ» обществăлла организацин вырăнти уйрăмĕн запасри офицерĕсем Б.С.Васильевпа Н.Г.Иванов пулăшрĕç. Ăмăртусенче палăрнă командăсене тата чи маттур спортсменсене дипломсемпе грамотăсем парса чысларĕç.
Н.ВАСИЛЬЕВ,
Вăрнарти ял хуçалăх техникумĕн преподавателĕ.