27 февраля 2016 г.
Халĕ чылай ялта вăрçă ветеранĕсем юлмарĕç. Уйкас Кипек вара мухтавлă ветерансемпе пуянрах пек туйăнать, кунта паян виçĕ ветеран пурăнаççĕ-ха – 93 çулхи Валентин Емельянов, 92 çулхи Николай Трофимов тата 89 çулхи Яков Шоркин. Çавсенчен Валентин Емельянов çинче ытларах чарăнса тăрасшăн.
Унăн пурнăç шăпи йывăр тапхăрсемпе çыхăннă. Валентин тăхăр уйăха çитсен амăшĕ чирлесе вилет. Ашшĕн тепĕр хут авланма лекет. Юрать-ха, амаçури амăшĕ Валентина хăйĕн ачи вырăнне хурса пăхса çитĕнтерет.
Вăтам шкул пĕтерсен Валентин Емельянов вăрçа каять, Ленинград хулине нимĕç фашисчĕсенчен хÿтĕлет. Унăн пулеметчик та, снайпер та, танксене хирĕç пемелли оруди командирĕ те пулма лекет. Пĕррехинче хăй те аманать, госпитальте выртать. Çав вăхăтра Валентин Емельянов паттăрла çапăçса вилни çинчен ашшĕ патне хут çитет... Паттăр салтак сывалса тухсан Çĕнтерÿ кунĕ çитичченех, тăшмансене хирĕç çапăçать. Вăрçă чарăнсан икĕ çултан çеç яла таврăнать. ,нерхи фронтовика Вăрман Кипекри шкула ĕçе илеççĕ. Çав вăхăтрах хăй пĕлĕвне ÿстерет. Физкультура тата ĕç урокĕсене тивĕçлипе ирттерет. Пуçламăш классене вĕрентекен Мария Ефимовна Кузнецовапа çемье çавăраççĕ. 65 çула яхăн пĕрне-пĕри юратса, шăкăл-шăкăл пурăнаççĕ вĕсем. Ултă ача çуратса çитĕнтереççĕ (тăватă ывăлпа икĕ хĕр). Пурне те пурнăç çулĕ çине тăратаççĕ.
Мария Емельянова пилĕк çул каялла çут тĕнчерен уйрăлчĕ. Валентин Емельянов кĕçĕн ывăлĕпе, кинĕпе тăван ялта пурăнать. ,лĕкренпе пыл хурчĕсене пăхас ăсталăха ашшĕнчен хăнăхнăскер, çав ĕçе халь те пăрахмасть.
Вунă çул каялла В.Емельяновăн мăнукĕ Ленинградри вăрçă архивĕнче упранакан вилнисен списокĕнче аслашшĕн ятне тупнă. Списокĕн ксерокопийĕ паян кун та Валентин Емельяновăн килĕнчи архивĕнче упранать. Ленинград облаçĕнчи ирĕке кăларнă ялта лартнă туслăх палăкĕ çинче çырнă вилнисен списокĕнче халь те Валентин Емельянов ячĕ сыхланса юлнă иккен.
Вениамин ИВАНОВ.