27 февраля 2016 г.
Çак юхăм районта малалла аталанса пынă май, кадетсен ушкăнĕ Мăн Явăшри вăтам шкулта çулталăк каялла, Тăван çĕршыв хÿтĕлевçисен уявне палăртнă май чăмăртанчĕ.
Ачасем пĕлтĕр 7-мĕш класра вĕренетчĕç. Унтанпа вĕсем палăрмаллах маттурланнă. Кадетсене ыттисем вăй-хал тĕлĕшĕнчен те ăмсанаççĕ, вĕренÿре те вĕсемпе тан пыма ăнтăлаççĕ. Ушкăн ертÿçи – Таня Иванова пуриншĕн та хавхалантаракан тĕслĕх шутланать. Парадри вăйăсенче командирсем хушшинче кăçал та мĕнпур ăмăртура класĕпе пĕрле мала тухса çĕнтерчĕ. Пĕлтĕр вăл Мускавра, Пĕрремĕш кадет корпусĕнче пулса курчĕ, çĕнĕ юлташсем тупрĕ, корпус комплексĕпе тĕплĕн паллашрĕ. Çакăншăн, паллах, кадет корпусĕн штатри сотрудникĕ, çар вăййисен Мăн Явăшри хастар спонсорĕ Эрик Васильевич Васильев полковник тăрăшнă. Таня кăкăрĕ çинче Аслă Çĕнтерĕвĕн 70 çулне халалланă асăну медалĕ ялкăшать.
Мăн Явăшри вăтам шкулта февральти Çар парачĕсем 2004 çултанпа пулса пыраççĕ. Парад яланах Аслă Çĕнтерĕвĕн Рейхстаг тăррине хăпартса çакнă ялавне Хисеплĕ караула илсе тухнипе пуçланать. Унта ачасем 1-мĕш класрисенчен пуçласа пурте хутшăнаççĕ. Чи сатуртараххисем – космонавтсемпе кадетсен класĕсем. Кăçалхи ăмăртусенче (стройпа утма, командăсене тĕрĕс пурнăçлама, марш юрри янраттарма, тăхăнмашкăн килĕшÿллĕ форма суйласа тупма – тата ытти тем те пĕре пĕлмелле) 4-мĕшпе 6-мĕш классен пуçарулăхĕпе хастарлăхне мала хурса палăртрĕç. Александра Петрова (4-мĕш класс) форма капăр çĕлеттернĕ, Маргарита Ильина (7-мĕш класс) чаплă юрă тупнă, хăйсен юлташĕсене командирсем – Владимир Митрофановпа Эдик Кошкин (9-мĕш класс), Виктор Петров (11-мĕш класс), Никита Петров (3-мĕш класс), Федор Федоров (5-мĕш класс), Аня Миронова (6-мĕш класс) тĕплĕ хатĕрленĕ.
Э.Васильев полковник парни çулленхиллех кашни ачана тивĕçрĕ. Çав шутра пылак кучченеç те, кĕнекеллĕ парнесем те пур. Федор Федорова, Павел Арсентьева, Павел Павлова, Дмитрий Петрова Мускаври Пĕрремĕш кадет корпусĕн бушлачĕсене тăхăнтартрĕç.
Раççей Çарĕн шкулти уявне Мăн Явăш çыннисем, Э.Васильевăн юлташĕсем çитсе курчĕç.
Михаил ВАСИЛЬЕВ.