27 февраля 2016 г.
«Август» Фирмăн «Вăрнарти хутăш препаратсен завочĕ» филиалĕнче тимлекен хĕрсем арçын-ĕçтешĕсене Çĕршыв хÿтĕлевçин кунĕ ячĕпе чаплă парне кÿчĕç – пĕр сехет çурă тăсăлакан концерт кăтартрĕç.
Пĕтĕм номере чунпа хатĕрленĕ, вырăс, чăваш юррисем, илемлĕ ташăсем, экран çинче – завод ĕçченĕсен çарти пурнăçĕнчи сюжетсем. Заводра ĕçлекен мĕнпур хĕрарăм ячĕпе производствăпа диспетчер пайĕн пуçлăхĕ Ольга Числова саламларĕ. Концерта суту-илÿ администраторĕпе Алина Ананьевапа 180-мĕш цех мастерĕ Ольга Илларионова ертсе пычĕç.
Бухгалтери хĕрĕсен номерĕ чăн-чăн парне пулчĕ. Сăпайлă матрÿшкесенчен вĕсем пĕр самантра чăрсăр негритянкăсем пулса тăчĕç.
Елена Лукояновапа унăн Полина хĕрне кăмăллăн йышăнчĕç. «Березка» ача сачĕн ушкăнĕ «Морячка» ташша парнелерĕ. Фитнес-аэробика енĕпе Чăваш ен чемпионĕсем – «Химик» спортклубĕн воспитанникĕсем – ăсталăхĕпе тĕлĕнтерчĕç.
Çавăн пекех «Çар запасĕ» курава экспонатсем тăратакансене те чысларĕç. Курав уяв каçне илем кÿчĕ çеç мар, хăнасенче те чылай кăсăклăх çуратрĕ. Халĕ арçынсем пултарулăх парни хатĕрлеççĕ, умра – мартăн 8-мĕшĕ.