27 февраля 2016 г.
Февралĕн 21-мĕшĕнче Чăваш Республикин Патшалăх Канашĕн депутачĕн «Август» Фирмăн «Вăрнарти хутăш препаратсен завочĕ» филиалĕн директорĕн Владимир Свешниковăн парнисемшĕн республикăри йăлана кĕнĕ футбол турнирĕ иртрĕ.
Ăмăртăва хутшăнакансен йышĕ кашни çул ÿссе пырать. Ку хутĕнче Чăваш ен районĕсемпе хулисенчен 16 команда килсе çитрĕ – çакă хăйне май рекорд. Турнира хутшăнма кăмăл тунисем каланă тăрăх, ăмăртăва çÿллĕ шайра ирттерни хăй патне туртать. Ачасене вара парне илме килĕшет. Мĕншĕн тесен республикăра кĕçĕн çулсенчисем валли турнирсем час-часах иртмеççĕ. Тренерсем аван ăнланаççĕ, çамрăк футболистсемшĕн тĕрлĕ командăсемпе тĕл пулса выляни ăсталăха ÿстерме май парать.
2004 – 2005 çулсенче çуралнисем хĕллехи футболла «Химик» стадионăн пĕчĕк уйĕнче вылярĕç. Çанталăк лайăх тăчĕ, ачасен кăмăлĕсем те савăк пулчĕç. Выляв уйĕпе юнашар хывăнса тăхăнмалли пурри пушшех те лайăх. Кунта ăшă та таса. «Химик» спорт клубĕ икĕ команда тăратнă. Тĕп команда нихăш вăййа та выляса ямарĕ, виçĕ вăййа никам выляса илейменнипе вĕçлерĕ пулин те çурма финала тухаймарĕ. Çĕнтерÿçи – «СК Центр Спартак».
Кĕçĕн футболистсем – 2007–2008 çулсенче çуралнисем – мини-футболра тупăшрĕç. Çĕнтерÿçи – Шупашкарти «ДЮСШ – 2007».
Чи лайăх вăйăçсене те палăртрĕç. Мини-футболра чи лайăх тапăнса выляканĕ – «Химик-Август» командăри Никита Федоров.
Çĕнтерÿçĕсене саламланă май, Владимир Свешников пурне те пурнăçра хастар пулма сунчĕ.
Людмила ИВАНОВА.