20 февраля 2016 г.
Нарăс уйăхĕн 13-мĕшĕнче Авшак Элмен клубне Мария Александровна Андроникована 65 çулхи юбилейпе саламлама пухăнчĕç. Ярмушкари «Утмăлтурат» ушкăн та çитрĕ.
Мария Александровна ку ялтах çуралнă. Шкул хыççăн хĕрача пурнăçне хулапа çыхăнтарас темен. Вăл тăван колхозра ĕçлеме пуçланă. Çав çулсенче «Гвардеец» колхоз вăй илсе аталанса пынă. Çамрăк хĕре фермăра ĕне сума шаннă. Çивĕч те тăрăшуллăскер, хайне шанса панă ĕçе юратса, тирпейлĕн, чунне парса туса пынă. Кÿршĕлле урамра çуралса ÿснĕ каччă илемлĕ хĕре савса пурăннă, хăйĕн мăшăрĕ пулма çураçнă.
Икĕ ывăлпа икĕ хĕр парнеленĕ савнă арăмĕ мăшăрне. Çемье тĕреклĕ те çирĕп пулнă, выльăх-чĕрлĕх усранă, ачасем ÿстернĕ. Анчах та телейпе-савăнăçпа юнашарах хуйхă. 38 çулхи хĕрарăм тăватă ачапа пĕчченех юлать. Юратнă ĕç ăна пурнăçра хуçăлма паман. Вăл ачисене пурнăç çулĕ çине тăратас тесе куллен тăрăшнă.
Юратнă амăшне, кукамăшне, асламăшне юбилейпе саламлама йышлăн пуçтарăннă. Инçе çула кĕскетсе Иркутск тăрăхĕнчен те çитнĕ. Эпир, Ярмушка ял тăрăхĕнче тимлекенсем, Мария Александровнăна çирĕп сывлăх, вăрăм кун-çул, канлĕ ватлăх сунатпăр.
Лиана ГРИГОРЬЕВА.