13 февраля 2016 г.
Тÿрĕ кăмăлпа тăрăшакан хисепре. ĕç çыннин çулталăкĕнче Вăрнарти выльăх-чĕрлĕх чирĕсемпе кĕрешекен станци пуçлăхĕн заместителĕ Георгий Николаевич Иваничев пысăк ят-сума тивĕçрĕ. Ăна ветеринари тытăмĕнчи пархатарлă ĕçсемшĕн тата нумай çул тÿрĕ кăмăлпа тăрăшнăшăн Чăваш Республикин Пуçлăхĕн кăçалхи нарăс уйăхĕн 8-мĕшĕнчи 7-мĕш Указĕпе килĕшÿллĕн «Чăваш Республикин тава тивĕçлĕ ветеринари врачĕ» хисеплĕ ят панă.
– Эпĕ хама телейлĕ çынсенчен пĕри тесе шутлатăп. Мĕншĕн тесен юратнă ĕçре 47 çул вăй хуратăп,– терĕ Георгий Иваничев. Чăваш Республикин тава тивĕçлĕ ветеринари тухтăрĕ пĕлтĕрхи ĕç кăтартăвĕсемпе кăмăллă. Районта выльăхсене уртаракан, лейкоз чирĕсем ернĕ пĕр тĕслĕх те пулман. «Профилактика мероприятийĕсене ирттерессипе çине тăрса ĕçлетпĕр. Акă çуркунне кушаксене, йытăсене урнă чиртен, сурăхсене çĕпĕр язвинчен вакцинаци тума пуçлатпăр. Лейкоз, туберкулез ан сарăлтăр тесе ĕне выльăха тĕрĕслетпĕр тата ытти ĕçе пурнăçлатпăр», – палăртрĕ Георгий Николаевич.
Вăл Çĕмĕрле районĕнчи Уйпуç Ялтăрара хресчен çемйинче çуралса ÿснĕ. Унăн кукамăшĕ Анастасия Порфирьева пирĕн ентеш, Вăрнар районĕнчи Ишлĕ ялĕнче кун çути курнă. Чĕрчунсене юратни Георгие пулас профессие суйлама пулăшнă. Юманай ялĕнчи вăтам шкула лайăх паллăсемпе пĕтерсен Хусана каять, кунти ветеринари институтĕнче экзаменсем тытать. Шел пулин те балл çитмен пирки вĕренме кĕреймест. Анчах та яш каччă хăйĕн умне çирĕп тĕллев лартать. «Хусанти ветеринари институтне çавах вĕренме кĕретĕпех, аслă пĕлÿ илетĕпех»,– тесе тупа тăвать. Вăрнарти техникумра ветеринар специальноçне алла илсен Георгий Иваничев тăван районĕнчи выльăх-чĕрлĕх самăртакан совхоза ĕçе вырнаçать. 1970 çулта унăн салтака кайма ят тухать. Ытти мĕнпур яш-кĕрĕм пекех çутă та пархатарлă тивĕçе пурнăçласа таврăнсан Юманайри ветеринари участокĕнче ĕçлеме пуçлать. Пултаруллă специалиста асăрхаççĕ, Георгий Иваничева Хутарти ветеринари участокĕн заведующийĕн пуканне шанса параççĕ. Ĕçленĕ вăхăтра ĕмĕт-тĕллеве пурнăçа кĕртес тесе каллех Хусана каять. Хальхинче экзаменсене ăнăçлă тытса Н.Э. Бауман ячĕллĕ ветеринари институчĕн студенчĕ пулма тивĕçет. Аслă шкулта вĕреннĕ вăхăта Георгий Иваничев хавхаланса аса илет. «Пирĕн ушкăнра тĕрлĕ халăх – чăваш, вырăс, тутар,узбек, мари, коми – çыннисем ăс пухатчĕç. Институтра вĕреннĕ вăхăтра пурте туслă пурăннă. Алла диплом илсен те пĕр-пĕринпе нумай çул çыхăну тытрăмăр»,– терĕ вăл.
Георгий Иваничев çемйипе Вăрнара куçса килсен аш-какай комбинатĕнче вăй хума тытăнать. Предприятире 16 çул тимлет. 1997 çултанпа Вăрнарти выльăх-чĕрлĕх чирĕсемпе кĕрешекен станцире тăрăшать. Яваплăх туйăмĕ пысăк пулнăран, хастарлăх кăтартнăран Георгий Николаевича 2005 çулта ветстанци пуçлăхĕн заместительне лартаççĕ. Çак ĕçре паянхи кун та тÿрĕ кăмăлпа тăрăшать.
Пултаруллă ветеринара тĕрлĕ шайри наградăсемпе чысланă. Иртнĕ çул вăл «Чăваш Республикин ĕç ветеранĕ» хисеплĕ ята илме тивĕçнĕ.
Елена ПОРФИРЬЕВА.