06 февраля 2016 г.
Вăрнарти историпе таврапĕлÿ музейĕн ĕçĕнче иртсе кайнă çулталăкра та тĕп вырăнта историпе культура пуянлăхне упраса хăварасси, çынсен тавракурăмне анлăлатасси, халăхăн культура ăнланулăхне ÿстересси тата йăли-йĕркине малалла тăсасси пулса тăнă.
– Иртнĕ вăхăт ялан асра пулмалла, çамрăк ăрăвăн вăрçă çулĕсенчи паттăрлăха та, мирлĕ пурнăçри ял çыннисен хастарлăхне те манма юрамасть. Музейра вырăн тупнă япаласем пирĕн истори те, ĕмĕрсен пуянлăхĕ те, – терĕ музей директорĕ Елена Шарипова.
Пĕлтĕр сахал мар ĕç туса ирттернĕ: 121 тишкерÿллĕ тата тематика экскурсийĕ йĕркеленĕ. Шупашкарти «Радуга» центрĕпе пĕрле темиçе курав хатĕрленĕ. 28 массăллă мероприятие 1500 çын хутшăннă. «Краевед» пĕрлешÿ «Тăван çĕршывăн Аслă вăрçин летопиçĕ» видео энциклопеди хатĕрлессипе ĕçсене малалла тăснă. Вăрнарти ТВ-АЛЕКС телевидени валли музей фондĕнче упранакан çырусем тăрăх видеосюжет хатĕрлесе панă. Май уйăхĕн 9-мĕшĕ тĕлне шкул ачисем вăрçăпа тыл ветеранĕсемпе тĕлпулу каçĕ йĕркелесе ирттернĕ. 9-мĕш класра вĕренекен Руслан Иванов «По рекам памяти» республикăри конкурсра тĕпчев ĕçĕпе пĕрремĕш вырăна тухнă. Репресси страницисем тăрăх хатĕрленĕ «Кулак ачи» тĕпчев ĕçĕ музей фондне пуянлатнă. Вăрнарти музей çавăн пекех патшалăхăн кинодокументаципе электрон архивĕнче «Кунта Аслă Çĕнтерĕвĕн пĕр пайĕ пур» электрон издание хатĕрлеме пулăшнă: видеоматериалсемпе документсен копийĕсене панă. Музей ку ĕç-хĕле лайăх туса ирттернĕшĕн культура министерствин Тав çырăвне тивĕçнĕ.
– «Акатуй-2015» уявра иртнĕ фольклор фестивалĕнче «Салтака ăсататпăр» йăла-йĕркене кăтартрăмăр. «Вăрнарти Кулибин» техника куравĕнче çичĕ рационализаторăн ĕçĕсене курма пулчĕ, – пĕлтерчĕ Елена Ивановна.
2015 çулхи май уйăхĕн 8-мĕшĕнче Вăрнарти хими завочĕн ,ç мухтавĕн музейĕ пĕрлехи проекчĕпе вăрçă темипе çыхăннă куçса çÿрекен курав ĕçленĕ. Иртнĕ çул музей 16 экспонатпа пуянланнă. Шел пулин те хăшпĕр япаласене упрама вырăн çитмест. Çавăнпа пĕрешкел экспонатсене шкул çумĕнчи музейсене пама тивет.
Юрий КОРНИЛОВ.