06 февраля 2016 г.
– Кире пуканĕ йăтассипе шкул ачисем хушшинче иртнĕ Чăваш Республикин первенстви уйрăмах хĕрсемшĕн унчченхинчен тупăшуллăрах, хĕрÿрех иртрĕ, – пĕлтерчĕ Анатолий Иванов тренер-преподаватель.
Шăпа янипе помост çине маларах тухма тивнĕрен Вăрнарти 1-мĕш шкулта вĕренекен Катя Лукинашăн ăмăрту кулянуллăрах та асра юлнă. Контрольлĕ вăхăтра вăл 16 килограмлă кире пуканне 105 хутчен çăп-çăмăллăн çĕкленĕ. Ун хыççăн тухнă Елчĕк тата Етĕрне хĕрĕсен вăйĕсем начартарах пулнă, анчах та вĕсем пур-çук вăйне пухса пĕрер очкопа Катьăран ирттернĕ. Ăмăрту ăмăртăвах çав – Вăрнар хĕрĕн виççĕмĕш вырăнпа çырлахма тивнĕ.
Тимĕрçкасси каччи Александр Николаев хальхинче те тĕлĕнтернĕ. 24 килограмшар икĕ кире пуканне тĕртсе вăл пилĕк минутра 63 хутчен, иккĕмĕш программăра – алăсене улăштарса 105 хутчен çĕкленĕ.
Ку спортсменсем результатсем парассине иккĕленмен, Шĕнер Ишек каччи, Калинино шкулĕнче вĕренекенскер, çĕнтерме пултарни чăн-чăн парне пулса тăнă. Александр Федорович Михайловăн воспитанникĕ Олег Леонтьев икĕ енлĕ тупăшура пĕтĕмпе 111 очко пухнă.
Республика первенствинче ку шкулта вĕренекен Снежана Мартынова та, Кульцаври Мария Першуткина та, Вăрнарти 2-мĕш шкулти Максим Шашковпа Наиль Басыров та япăх мар ăмăртнă, результачĕсене лайăхлатнă.