06 февраля 2016 г.
«Август» Фирмăн «Вăрнарти хутăш препаратсен завочĕ» филиалĕ йĕркеленĕ Сывлăх кунĕ унта хутшăнакансене нумайлăха хаваслă кăмăл парнелерĕ
Уяв фитнес-центр çумĕнче иртрĕ. Çемье канăвĕ валли мĕнпур условисем пулнăран çав кун сывлăх кунĕнче ачасем те йышлăн савăнчĕç. Кăмăл тăвакансем йĕлтĕрпе, конькипе ярăнчĕç, футбол вылярĕç, фитнес-центрти занятисене хутшăнчĕç.
Кунтах чăн-чăн пултарулăх площадки ĕçлерĕ – командăсем юр кÿлеписем ăсталассипе ăмăртрĕç. Кун пуçламăшĕнче вĕсем ахаль тăваткалсем кăначчĕ, темиçе сехетрен вара тĕлĕнмелле фигурăсене çаврăнчĕç.
Командăсем эскизсене маларах хатĕрленĕ, аллисенче – тĕрлĕ инструментсем. Вĕсене сăнанă май, кашниех чунтан тăрăшни аван курăнчĕ.
Нумайăшĕшĕн юр шурă упапа çыхăнни сисĕнчĕ. Упа кÿлеписем тăваттă ÿссе ларчĕç, пĕри вара – Упапа Умка упа çури – пĕрремĕш вырăн йышăнчĕ. Авторĕсем – 180-мĕш цех ĕçченĕсем. Командăн тĕп скульпторĕсем – Николай Егоров мастерпа унăн хĕрĕпе ывăлĕ.
2016 çул символĕ, упăте те, паллă вырăн йышăнчĕ. Ăна завод ĕçченĕсем тĕрлĕ сăнарсенче калăпларĕç. Анчах та полимерлă тарăсем кăларакан цех коллективĕн упăтине ăсталама чи йывăрри пулчĕ. Жюри ăна иккĕмĕш вырăн пачĕ.
Виççĕмĕш вырăнта – «Юмахри кăмака». Ку – персоналпа ĕçлекен пайĕн, директор аппарачĕн, производствăпа диспетчер пайĕн тата тĕп технологăн пайĕн ĕçченĕсен коллективлă ĕçĕ. Кăмакаран ăшă «тапса» тăчĕ, ун çинче кушаксем «ăшăнчĕç», алсишсем «типĕнчĕç». 102-мĕш цех арçынĕсен «Морж тытма – сунара» композицие те виççĕмĕш вырăн пама йышăнчĕç.
Ку площадкăра лăпкăлăх хуçаланчĕ пулсан, юнашарти тăвайккинче – пачах урăхла. Кунта пысăк хĕрÿлĕхпе эстафета иртрĕ. Чупу патакки вырăнĕнче – «ватрушкăсем». Хăвăрт ярăнса анасси, çавăн пекех хăвăрт чупса хăпарасси конкурса хутшăнакансене те, вĕсемшĕн «чирлекенсене» те хавхалантарчĕ. Кунта та ăсталăх кирлĕ иккен!
Эстафетăн иккĕмĕш тапхăрĕ пушшех кăсăклă пулчĕ. Финиша «ватрушка» çине командăри юлташа лартса хăвăртрах чупса çитмелле пулчĕ. 18 командăран чи хăвăрттисем – пушар хуралĕн, энергоцех тата 102-мĕш цех ĕçченĕсем.
Участниксем хушшинче ветерансене курма та кăмăллă пулчĕ. Аслă ăрури тăватă хăюллă хĕрарăм эстафетăн мĕнпур тапхăрне пуринпе тан тухрĕç.
Çанталăк ăшă тăчĕ пулин те вĕри чей ĕçме никам та хирĕçлемерĕ. Калинино райповĕ çавăн пекех тутлă кукăльсемпе, шашлăкпа сăйларĕ.
Юртан кÿлепе ăсталкансене тортсем парса хавхалантарчĕç. Эстафетăна хутшăнакансене вара спорт хатĕрĕсем парнелерĕç.
Хĕллехи футболра ветерансем çамрăксенчен хастартарах пулчĕç, 3:1 шутпа выляса илчĕç пулин те, туслăх çĕнтерчĕ.
Людмила ИВАНОВА.