03 февраля 2016 г.
Январĕн 27-мĕшĕнче 3 сехет те 3 минутра полицин «Вурнарский» пайĕн дежурнăй чаçне шăнкăрав килнĕ, хĕрарăм пăлханчăк сасăпа Вăрнар поселокĕнчи Путевая урамри 25-мĕш çурт çуннине, çулăмра çынсем пулма пултарнине пĕлтернĕ.
Дежурнăй чаçĕн оперативлă дежурнăй хушăвĕпе следствипе оперативлă ушкăн – уголовлă шырав уйрăмĕн пуçлăхĕ, полици подполковникĕ Станислав Николаев, участокри аслă уполномоченнăй тата çула çитмен ачасемпе ĕçлекен инспектор Ираида Тихонова капитан, аслă следователь Сергей Атюкин юстици майорĕ тата Александр Смирнов водитель-старшина – тÿрех инкек вырăнне тухса кайнă.
Вĕсем пынă çĕре пĕр хутлă пилĕк хваттерлĕ баракра 1-мĕш хваттер çуннă. Çурт çывăхĕнчи хĕрарăм ачасене çăлма йăлăннă. Шутласа тăма вăхăт пулман, шалти çынсем тĕтĕмпе чыхăнма пултарнă. С.Николаевпа С.Атюкин хваттер чÿречине çĕмĕрнĕ, ун çывăхĕнче кил хуçи арçынĕ тăнсăр выртнине асăрханă. Çула çитмен икĕ ача, сасăпа вăраннăскерсем, урама чупса тухнă. Полицейскисем арçынна йăтса тухнă. Çав вăхăтра И.Тихоновапа А.Смирнов ытти хваттерсене шаккаса пушар çинчен пĕлтернĕ. Пушар машинисем çитиччен вĕсем мĕнпур çынна эвакуациленĕ. Вĕсен паттăрлăхне пула çулăмра никам та шар курман.
Вут-çулăм кăмакапа усă курнă чухне правилăсене уяманнипе тухнă.
Лия ЗАБИРОВА,
полицин «Вурнарский» пайĕн пуçлăхĕн помощникĕ.