03 февраля 2016 г.
Виçĕмçул районти сунарçăсем Шĕнер Ишек тата Кĕперлĕ Кÿлхĕрри çыннисене шар кăтартнă виçĕ кашкăра тытнăччĕ, кăçал вĕсен аллине тăваттăн çакланнă.
Кашкăр кĕтĕвĕ хальхинче те Кĕперлĕ Кÿлхĕрри тăрăх сахал мар çÿренĕ, хурсене, килти йытăсене тыта-тыта çинĕ. Çулла Анатолий Гусевăн кунти вăрманти утарĕнче тытнă сурăхĕсене турта-турта çурнă.
Тискер чĕрчунсене Вăрманкас çулĕ çинчи Мăньял Хапăс чарăнăвĕ патĕнче, Хапăсри хозцентр тĕлĕнче темиçе те курнă. Калинино заказникĕнче хир сыснисене темиçе те тĕп тунă.
Кăçал «Рассвет» тулли мар яваплă обществăна пĕрлешекен Вăрнар тата Çĕмĕрле районĕсенчи сунарçăсем ятарлă ирĕк илнĕ хыççăн хÿптĕрлеве Калининăри патшалăх заказникĕнче йĕркеленĕ. Аслă ертÿçи – Николай Косулин, ушкăна ертсе пыраканĕсем – Владислав Платонов, Виталий Адюков.
Кашкăрсене пĕтĕмпе çирĕмĕн йĕрленĕ. Тĕл перекенĕсем – Владислав Платонов (иккĕшне лектернĕ), Сергей Бойцов тата Олег Александров. Виçĕмçулхи пекех кусем те – çулталăка çитмен çурасем. Патварăшне, мăнтăрăшне пăхсанах вĕсем выçăпа пĕртте аптăраманни, эппин, чылай чĕрчуна туллани аван курăнать.
– Ку кĕтÿре кашкăрсем çиччĕнччĕ. Анчах та заказникре пирĕн кăçал вĕсене тăваттăран ытла тытма ирĕк çук. Малашне хуçалăхра е патшалăх резервĕнче кăна пеме юрать, – пĕлтерчĕ Леонид Михайлов.
Кашкăрсем сăтăр тунипе, çынсене тапăнма пултарнипе кăна хăрушă мар, вĕсем тĕрлĕ чирсене, вăл шутра – урнине те ертме пултараççĕ. Сунарçăсем тытнă чĕрчунсен тирĕсене сÿсе ÿчĕсене Шупашкара лабораторине ăсатнă.
Светлана ЧИКМЯКОВА.