27 января 2016 г.
Шупашкарта фитнес-аэробика енĕпе иртнĕ ача-пăча фестивалĕ, Чăваш ен чемпионачĕ Вăрнар ятне черетлĕ çитĕнÿпе çĕклерĕ – «Химик» спорт клубĕн «NEXT» ушкăнĕ хăйĕн ÿсĕмĕнче çĕнтерÿçĕ Кубокне çĕнсе илчĕ.
Елена Аликован сасăранах палăракан савăнăçне ăнланма пулать – унăн воспитанникĕсем чылай сумлă турнирăн пьедесталĕ çинчен анмаççĕ-çке! Хальхинче те ăнăçу вăрнарсене кÿрентермен – «Аэробика» номинацире пирĕн хĕрсем чи маттуррисем пулнă, Патăрьел, Канаш, Çĕмĕрле, Шупашкар командисенчен (пĕтĕмпе саккăр) ирттернĕ.
Çĕнтерÿçĕ-юниоркăсен ушкăнне пултаруллă хĕрсем пĕрлешнĕ: Олеся Сюмайкина, Карина Хисамутдинова, Настя Кириллова, Мария Сагунова, Катя Ананьева, Татьяна Гудзе тата Снежана Алексеева.
Ку – хĕрсен, тренерсен çитĕнĕвĕ çеç мар, ашшĕ-амăшĕ ачисене тĕрĕс çул пани те, хавхалантарса тăни те.
– Хĕрĕмĕн, Катьăн, фитнес-аэробика енĕпе тĕрлĕ шайри турнирсенче çĕнсе илнĕ медальсем вунпĕр. Спорт ташшипе маларах туслашнисен ытларах та пулĕ. Чи кирли – çак ăмăртусем ачасене ÿсме, аталанма, çĕнтерÿ патне ăнтăлма вĕрентме пулăшаççĕ, – терĕ акă Алина Ананьева, Вăрнарти хутăш препаратсен завочĕн ĕçченĕ, хăй те фитнеспа туслăскер.
Калас пулать, вăл хĕрĕпе кашни турниртах пĕрле. Номер вăхăтĕнче, тен, ачинчен те ытларах хумханать пулĕ. Ытларах, паллах, хĕпĕртет – маттур хĕр çитĕнет-çке.
Хĕрÿ ăмăртусем умĕн спортăн чи илемлĕ тĕсĕн тусĕсене Чăваш ен Пуçлăхĕ Михаил Игнатьев, физкультурăпа спорт министрĕ Сергей Шелтуков, фитнес-аэробика федерацийĕн пĕрремĕш президенчĕ Оксана Вербина саламланă, фитнес-аэробика яллă вырăнсенче те анлă сарăлнине, ку тĕс ачасене сывă, çивĕч, çаврăнăçуллă пулма хăнăхтарнине палăртнă.
Светлана ЧИКМЯКОВА.