20 января 2016 г.
кăçал та пин вырăнлă зала тултарчĕ, республикăри мĕнпур массăллă информаци хатĕрĕсен ĕçченĕсене пуçтарчĕ
– Республикăри информаци политики уçă, влаçпа общество хушшинче усăллă диалог йĕркеленнĕ. Çакă патшалăх влаç органĕсене çынсем майлă йышăнусем тума май парать, – терĕ Чăваш ен Пуçлăхĕ Михаил Игнатьев.
Кăçал журналистсем умне çĕнĕ задачăсем, çĕнĕ темăсем тухса тăнине палăртрĕ: Чăваш енре 2016-мĕшĕ Ĕç çыннин, Раççейре Кино çулталăкĕ ячĕпе иртет. «Чăн-чăн ĕçченсем, вĕсен ĕçĕ çинчен каласа кăтарма мĕнпур ресурспа усă курмалла. Çакă çамрăк ăрăва ĕç çумне çыпăçма, Тăван çĕршыва юратма вĕрентсе ÿстерĕ», – терĕ вăл.
Михаил Игнатьев республикăри юлашки çулсенче пулса иртнĕ çĕнĕлĕхсем çинче чарăнса тăчĕ, журналистсене вĕсене тĕплĕн çутатнăшăн тав турĕ.
Чăваш ен информаци политикин министрĕ Александр Иванов пĕлтĕрхи кăтартусен пĕтĕмлетĕвĕнче Вăрнар район хаçатне ырăпа икĕ хутчен асăнни кăмăла çĕклерĕ. «Çĕнтерÿ çулĕ» кăçалхипе пиллĕкмĕш хут Раççейри «Прессăн ылтăн фончĕ» II степень уйрăмлăх паллине илчĕ. Ку шайри чыслава республикăри виçĕ хаçат кăна тивĕçнĕ.
Çавăн пекех «Çĕнтерÿ çулĕ» республикăри тепĕр виçĕ хаçатпа пĕрле Раççейри социаллă пĕлтерĕшлĕ изданисен переченьне кĕме пултарчĕ. Кăçалхи пĕрремĕш çулта юратнă хаçатăн тусĕсен йышĕ сыхланса юлнă çеç мар, пĕлтĕрхинчен кăшт ÿснине те çитĕнÿсен шутне кĕртмелле. Ÿсĕмпе «Çĕнтерÿ çулĕ» – республикăра иккĕмĕш вырăнта.
Экран çинчен, сцена çинчен Чăваш енри калем ăстисен ячĕпе кадрсем ылмашăннă, саламсем янăранă май чи-чи пултаруллисене тĕрлĕ шайри наградăпа чысларĕç. Пирĕн ĕçтеш – реклама пайĕн редакторĕ Оксана Семенова та сцена çине хăпарма тивĕçрĕ. Александр Иванов министр ăна пичет ĕçне пысăк тÿпе хывнăшăн Чăваш Республикин Информаци политикин тата массăллă коммуникацисен министерствин Хисеп грамотине саламласа тыттарчĕ.
Чăваш журналистикин 110 çулхи юбилейлă уявне Вăрнар район хаçачĕн пысăк ушкăнĕ хутшăнчĕ.
Светлана ЧИКМЯКОВА.