16 января 2016 г.
Алла кăсăклă статья çакланчĕ. Ун авторĕ Владимир Федотов хăйĕн аслашшĕне, Тăван çĕршывăн Аслă вăрçинче 1942 çулта пуç хунăскере, чылай çул шыранă.
Халĕ тупнă. Паттăр Калуга облаçĕнчи Вертное сали çывăхĕнчи тăванлăх масарĕнче канлĕх тупнă иккен. Ку сала 1944 çулччен Смоленск облаçне кĕнĕрен шырав тăсăлнă та.
Аслă Çĕнтерÿ кунĕ умĕн тăванĕсем аслашшĕн вилтăприйĕ çинче пулнă. Кунта салтак скульптурине, вилнĕ 497 салтак ятне çырнă икĕ мемориал хăмине вырнаçтарнă иккен. Вертное шкулĕн музейĕнче ку çывăхра 1942 çулта пынă çапăçусем пирки хаклă документсем нумай.
Çакă кăсăклă: асăну хăми çинче В.Федотовăн аслашшĕсĕр пуçне тата çичĕ чăвашăн ячĕ пур. Вăл шутра – пирĕн район çыннин те. Осипов Роман Осипович (? – 05.07.1942) Ойкас-Кибени тесе çырнă. Сăмахсăрах, Уйкас Кипекрен ĕнтĕ. Вăрнар районĕн Асăну кĕнекинче ăна Смоленск облаçĕнчи Починково районĕнчи Тимоховка салинче пытарнă тесе çырнă. Кĕнеке тăрăх вăрçăра вĕсем тăвансем виççĕн вилни паллă.
Интернетра, «Халăх паттăрлăхĕ» сайтра, Роман Осиповича Смоленск облаçĕнчи Сухиничи районĕнчи Тимоновка ялĕнче пытарнă тесе çырнă. Госпиталь хучĕ çинче пурнăçран уйрăлнă дата – 1942 çулхи июлĕн 5-мĕшĕ. Сурансене пула вилнĕ тенĕ. Амăшĕн ятне палăртнă – Лукерья Матвеевна Матвеева. Информацие Раççей Оборона министерствин 2007 çулхи май уйăхĕн 8-мĕшĕнчи хушăвĕпе вăрттăнсăрлатнă.
Тăванлăхĕ пурри-çуккипе кăсăкланса интернетра ку ялти пĕр хушаматлă хĕрпе Лариса Осиповапа (хĕр чухнехи хушамачĕ) çыхăнтăм. Роман Осипович чăнахах унăн кукашшĕ иккен. Амăшĕ, Раиса Романовна Осипова, вăрçă пуçлансан икĕ уйăхран çуралнă. Анчах çулталăк çитичченех тăлăха юлнă. Вăрçă хыççăн ун аçа çури шăллĕпе йăмăкĕ кун çути курнă.
Шăпи çавăн пек çырнă ĕнтĕ. Роман Осиповичăн пиччĕшĕ те çапăçу хирĕнчех пуçне хунă. Ун вилтăприйĕ те аякри Смоленск облаçĕн çĕрĕнче.
– Шыравçăсене пысăк тав. Вĕсене пула хамăн кукаçи ăçта канлĕх тупнине пĕлме май килчĕ. Аякри облаçре ун вилтăприне те типтерлĕ пăхса тăни чуна канлĕх кÿрет. Ку – пĕлтĕрхи, Аслă Çĕнтерĕвĕн 70 çулхи юбилейлă çулĕнчи, чи лайăх хыпар, – пĕлтерчĕ Лариса.
Светлана ЧИКМЯКОВА.