10 января 2016 г.
Чăваш Республикин Пуçлăхĕн творчествăри ăнтăлушăн паракан стипендине Вăрнар районĕнчен кăçал тивĕçнĕ çамрăксенчен ытларахăшĕ вĕренÿ хастарĕсем.
Вадим Самаровăн пултарулăхне акă театр искусствине кăмăллакансем аван пĕлеççĕ. Районти культура çурчĕ çумĕнчи çамрăксен драма ушкăнĕн членĕ республикăри «Мухтав ахрăмĕ» фестивалĕн номинанчĕ пĕрре мар пулчĕ. Пĕлтĕр вăл Эстони писателĕн М.Талвисăн пьеси тăрăх лартнă «Встреча» спектаклĕнчи тĕп сăнаршăн «Чи лайăх арçын ролĕ» номинацин çĕнтерÿçи пулса тăчĕ. Унпа пĕрле вылянă Ангелина Орехова – хĕрарăм рольне чи лайăх калăплаканĕ. Сăмах май, çавăн пекех Каринăпа Алина Савельевасемпе пĕрле сцена çине кăларнă пьеса республикăра «Чи лайăх ача-пăча спектаклĕ» номинацире çĕнтернĕ. Вадим – Вăрнарти ача-пăча ÿнер шкулĕн воспитанникĕ.
Кăçалхи стипендиатсен йышĕнчен Вăрнарти 1-мĕш шкулта вĕренекен Катя Лукинапа Никита Львов спортсменсем те хавхалантарăва ăнсăртран тивĕçмен. Юлашки çулта вĕсем (пĕри – полиатлонистка, йывăр атлетка, тепри – кĕрешÿçĕ) республикăри сумлă турнирсене парăнтарма пултарчĕç.
Пултаруллисенчен пултаруллисем вара пĕлтĕр пĕтĕмпе вуннăн. Çÿлерех асăннă çамрăксемсĕр пуçне уйăхсерен 1830 тенке республикăри 995 каччăпа хĕрпе пĕрле Хапăс шкулĕнчи Инесса Егорова, Вăрнарти 1-мĕш шкулти Евгения Тихонова, Вăрнарти 2-мĕш шкулти Анастасия Ермошкина, Дарья Захарова, Настя Ильина, Анна Корнилова, Калининăри вăтам шкулти Настя Павлова илсе тăрĕç.
Светлана ЧИКМЯКОВА.