13 января 2016 г.
Кăçал Чăваш енре Ĕç çыннин çулталăкĕ. Кирек хăш профессире тимлесен те чыс-хисепе тивĕçме пулать. Чи кирли – тÿрĕ кăмăлпа тăрăшни. Ĕç çынни тесе каласассăнах куç умне чи малтанах иртен пуçласа каçчен ял хуçалăхĕнче тар тăкакан хресчен тухса тăрать. Уй-хирте-и, фермăра-и тăрăшать вăл – çаннине тавăрать те тăван хуçалăха аталантарас тесе мĕнпур вăя хурать.
Хирпуçĕнче пурăнакан Лев Степанова шăпа Тюмене те, Мускава та илсе çитернĕ. Вăл водительте, строительте тимленĕ. Паллах, ĕмĕр тăршшĕпех çемьерен аякра пилĕк аваймастăн. Лев Степанов та пĕлтĕр вырăнти «Победа» ял хуçалăх производство кооперативне ĕçе кайса кĕнĕ. Выльăх пăхаканра тăрăшма пикеннĕ.
– Алевтина Семенова малашлăха куракан ертÿçĕ. Çавăнпа та ĕнтĕ хуçалăх экономики çирĕп. Ĕç çыннисене шалу вăхăтра тата тивĕçлĕ тÿлеççĕ. Малалла та «Победа» кооперативрах ĕçлесчĕ, – кăмăллăн калаçрĕ Лев Порфирьевич.
Арманта ĕçлекен Александр Алексеев та тăван хуçалăх аталану çулĕпе пынишĕн савăнать. «Çĕнĕ çула лайăх ĕç кăтартăвĕсемпе кĕтсе илтĕмĕр. Кăçал та ÿсĕм-çитĕнÿ тăвасчĕ», – терĕ вăл.
Юлашки 3–4 çулта «Победа» хуçалăхăн ферма территорийĕнче строительство, реконструкци ĕçĕсем чарăнса ларман тесен те йăнăш пулмĕ. Хирпуçсем 122 пуç пăру вырнаçакан витене çĕнетсе улăштарнă. Хуçалăх хăйĕн нухратне 3 миллион тенкĕ тăкакланă. Çак тапхăртах ферма çывăхĕнче арман çĕкленсе ларнă. Пĕлтĕр тата кооперативра 200 пуç ĕне вырнаçакан вите тăррине тĕппипех улăштарма пултарнă. Хуçалăх каллех хăйĕн укçи-тенкипе усă курнă.
«Победăра» ĕç çыннисем хăтлă условисенче тăрăшчăр тесе хытах тимлеççĕ. Акă дояркăсен санитари пÿлĕмне, выльăх-чĕрлĕх пăхакансен çуртне пĕр иккĕленмесĕрех офиспа е хваттерпе танлаштарма пулать. «Алевтина Петровна, хам тĕлĕннине пытармастăп. Кунта евроюсав туса ирттернĕ эсир», – терĕ районти чĕрчунсен чирĕсемпе кĕрешекен станци пуçлăхĕ Владимир Матвеев. Хуçалăх тилхепине тытса пыраканăн «Агро-Инновацисем» организацин районти уйрăмĕн пуçлăхĕпе Евгений Алексеевпа район администрацийĕн ял хуçалăхĕпе экологи пайĕн тĕп специалистчĕнчен Георгий Романовран та ыр сăмахсем илтме тÿр килчĕ.
– Ферма территорине хăтлăх, тирпей-илем кĕртессипе тăрăшма хамăр тăрăхри çамрăксене явăçтартăмăр. Вĕсем çав тери пуçаруллă, пултаруллă, çивĕч ăслă пулчĕç. Аллисем чăннипех ылтăн,– çирĕплетрĕ Алевтина Семенова ертÿçĕ.
Кооперативра мăйракаллă шултра выльăх 388 пуç, çав шутра ĕнесем – 135 пуç. Кунне вăтамра 1320–1350 килограмм сĕт патшалăха сутаççĕ. Продукцие 21 тенкĕпе вырнаçтараççĕ. Шурă ылтăна сутнипе кунсерен хуçалăх кассине 30 пин тенке яхăн пырса кĕрет.
«Победа» хуçалăх тилхепи çирĕп алăра пулни витĕрех курăнать. Ертÿçĕ пурнăçа ÿпкелешсе пĕр сăмах та каламарĕ. Вăл ĕç çыннисемпе пĕрле умри йывăрлăхсене ăнăçлă çĕнтерсе пыма хăнăхнă ĕнтĕ. Кооперативăн плансем пысăк. Кăçал ĕне витинче паянхи куна тивĕçтерекен сĕт пăрăхĕ вырнаçтарма палăртаççĕ. Тĕллев пурнăçлансан дояркăсен ĕçĕ самай çăмăлланĕ.
Елена ПОРФИРЬЕВА.