13 января 2016 г.
Вăрнар район администрацийĕн ЗАГС пайĕ 2015 çулта ĕç-хĕле планпа килĕшÿллĕн туса пынă. Ку пай пĕлтĕр 185 çĕнĕ çемьене регистрациленĕ. Хĕрсем виççĕшĕ ют çĕршыв çыннисемпе пĕрлешме кăмăл тунă: Молдовăпа Азербайждан республикисенче тата Таджикистанра кун çути курнăскерсемпе çырăннă. 2014 çулта вара 201 туй пулнă.
Иртнĕ çулта 320 пепке (2014 çулта 419 ача) çут тĕнчене килнĕ. Арçынпа пĕрлешмесĕр 88 хĕрарăм ача çуратнă. Пĕлтĕр, унчченхи çулхипе танлаштарсан, 99 ача сахалтарах çуралнă.
Шел пулин те, вилекенсем çуралакансенчен ытларах. 2015 çулта 616 çын çут тĕнчерен уйрăлса кайнă. Вĕсенчен 317-шĕ арçын, 299 хĕрарăм. Арçынсен пурăç тăсăмĕ 61 çулпа, хĕрарăмсен 75 çулпа танлашнă. 2014 çулхи кăтарту вара çапларах: 585 çын пурнăçран яланлăхах уйрăлса кайнă. ЗАГС пайĕн ĕçченĕсем пĕлтĕр нумай çул пĕрле пурăнакан мăшăрсене чысланă. Ашшĕ-амăшĕсене ачасем çуратнă ятпа саламланă. Çавăн пекех вĕсем тĕрлĕ мероприятисене хутшăннă, шкул ачисемпе тĕл пулусем ирттернĕ.