26 декабря 2015 г.
Çак ятпа республикăра пурăнакансем тата ун хăнисем валли Çĕнĕ çул порталĕ (www.новыйгод21.рф) ĕçлеме пуçланă.
Çĕнĕ ресурс Çĕнĕ çул канăвне йĕркелеме тĕрлĕ майсемпе пулăшать. Унта ăçта тата мĕнле канма сĕнекен учрежденисен списокне, тивĕçтерÿсен хакне, ĕç графикне, прокатсен пункчĕн контактлă даннăйĕсене тата ыттине те вырнаçтарнă. Турист базисемпе санаторисен переченĕ те пур.
Ашшĕ-амăшĕ порталпа усă курса ачисене Çĕнĕ çул представленийĕсене илсе кайма пултарĕ.
Çĕнĕ çул уявĕсене районсенче ирттерме май пулни кăсăклă. Январĕн 3-мĕшĕнче акă авалхи купец хули, Сĕнтĕрвăрри, хăнана йыхравлать. 4-мĕшĕнче Етĕрнене пулă тытма тата сунара тухма чĕнеççĕ. 5-мĕшĕнче Шупашкар районĕнчи Кĕçĕн Сĕнтĕр ялĕнче йытă кÿлсе ярăнма, вĕрен хулинче пулма, наци çимĕçне тутанма тата 2 метр çÿллĕш кăвайт урлă сикме май пур. Январĕн 6-мĕшĕ – спорт кунĕ. Мероприятисем Çĕнĕ Шупашкарти лаша-спорт шкулĕнче, Ельниково ращинче, тĕп стадионта, 3-мĕш спорт шкулĕнче иртĕç. Январĕн 7-мĕшĕнче Çĕрпÿре Раштав турне тухĕç.
Портала кĕрсе пăхăр – кунта хăвăра кирлĕ чылай информацие тупма пултаратăр.