26 декабря 2015 г.
Патшалăхпа общество деятельне, ученăя, публициста – Леонид Яковлевич Тянгова вилĕмĕ пирĕн хушăран сасартăк уйăрса кайрĕ. Талантлă юлташчĕ. Кун-çул шăпи пире малтан комсомолăн Вăрнар райкомĕнче тĕл пултарнăччĕ. Çавăнтан вара яланах пĕрле ĕçлемелле килсе тухрĕ. Юлташăмăра çапла пачах кĕтмен çĕртен çухатни пысăк хуйхăпа çапса хуçрĕ. Кăшт маларах çеç унпа телефонпа калаçнăччĕ. Вăл хавас кăмăллăччĕ. Хушăран-хушă çапла çыхăнса чун-чĕрене çырлахтарнă: хамăра хумхантарнă шухăшсемпе, ыйтусемпе тăтăшах пайланнă.
Леонид Яковлевич çынпа çывăхчĕ. Яш-кĕрĕм хушшинче, партипе совет органĕсенче, ĕç коллективĕсенче унăн тус-юлташсем нумайччĕ. Сакăрвуннăмĕш çулсенче, комсомолăн Пĕтĕм Союзри ударлă стройкинче – Шупашкарти промышленноç тракторĕсен заводĕнче штаб начальникĕнче тăнă чухне – Совет Союзĕнчи тĕрлĕ кĕтесрен пухăннисене ятран лайăх пĕлетчĕ. Вĕсене ĕçлеме, вĕренме, канма паха условисем туса парасшăн тăрăшатчĕ. ,ç вырăнне Советсен Çуртĕнчен завода куçарчĕ темелле. Трактор тăвакансемпе юлашки кунĕсемчченех çыхăнăва çухатмарĕ. Альберт Михайлович Захаров, комсомол бригадин пуçлăхĕ, Леонидсен килĕнчен татăлман, праçниксенче те пĕрле пулнă, юлташĕн мăшăрне, Лидия Федоровнăна, çемьери йывăр вăхăтсенче пулăшса тăнă.
Комсомолпа парти ĕçĕнчи ответлăхĕ ÿссе пынă май, Леонид Яковлевич пĕрмай малалла вĕренме талпăнатчĕ. КПСС Тĕп комитечĕн академине вĕренсе пĕтерчĕ, истори наукисен кандидачĕ пулчĕ. Пенсие тухсан та пайтах институтсенче ĕçлерĕ. Студентсемпе преподавательсем хушшинче авторитечĕ хисеплĕччĕ, пысăкчĕ. Тăватă-пилĕк çул хушши вăрнарсен «Туслăх» ентешлĕхне пуçаруллă ертсе пычĕ. Ун тĕслĕхĕпе ытти чылай районсем хăйсен ентешлĕхĕсен пĕрлĕхĕсене йĕркелесе ячĕç, Раççейри регионсенче чăвашсен диаспорисем чăмăртанчĕç. Леонид Яковлевич пионерипе комсомол юбилейĕсен ячĕпе чаплă мероприятисем йĕркелетчĕ, йăх-ăрусен çыхăнăвне вăйлатасшăн хăйпе пĕр шухăшлисене шыратчĕ.
Хăй вăхăтĕнче халăх депутачĕсен Вăрнар тата Етĕрне Канашĕсен депутачĕ, Чăваш АССР Аслă Канашĕн депутачĕ, комсомолпа партин районти, облаçри конференцийĕсен делегачĕ. Ертÿçĕ таланчĕ уйрăмăнах парти обкомĕнче – культура пайĕн пуçлăхĕнче тата идеологи ыйтăвĕсемпе ĕçленĕ секретарĕ чухне палăрчĕ. ,ç çыннисем хушшинче, творчество коллективĕсенче пĕрмай пулса опыт пухрĕ. Наци культурин уявĕсем йăлана кĕрсе пычĕç. Леонид Яковлевича ,çлĕх Хĕрлĕ Ялав орденĕпе, Халăхсен Туслăхĕн орденĕпе, медальсемпе наградăланă. Чи пысăкрах награди, паллах – чăваш халăх хисепĕ, Совет Союзĕнчи тăванла халăхсен ывăлĕ-хĕрĕ хисеплени пулчĕ.
Илья ПРОКОПЬЕВ.
2013 çулхи апрелĕн 30-мĕшĕ.