26 декабря 2015 г.
Ялти культура ĕçченĕсем, В.В.Илларионова, К.В.Сюмайкина тата «Телей пайăрки» юрăпа ташă ушкăнне çÿрекен ачасем Уравăш ялĕнче пурăнакан Николай Иванович Аляховпа Владимир Георгиевич Игнатьев патне çитсе курма шутларĕç. Вĕсем иккĕшĕ те йывăр чире пула тухса çÿреймеççĕ.
В.Г.Игнатьев 1949 çулта çуралнă. Шкул хыççăн Шупашкарта «Текстильмаш» предприятире, совхозра токарь пулса ĕçленĕ. Педагогика техникумне пĕтернĕ хыççăн Пăртас шкулĕнче физкультура учителĕнче тимлеме тытăннă. Анчах 1974 çулта, йывăр чирленĕ хыççăн, ĕçе пăрахма тивнĕ. Халĕ вăл шăллĕпе, унăн çемйипе пурăнать. Н.И.Аляхов 1948 çулта çуралнă. Калинино салинчи механизаци шкулĕнче вĕреннĕ. Нумай çул ялта трактористра, унтан Вăрнарта йывăç комбинатĕнче ĕçленĕ.
1975 çулта Рункă хĕрĕпе Мария Ильиничнăпа çемье çавăрнă, хĕрпе 3 ывăл пăхса ÿстернĕ, вĕсен 5 мăнук. Николай Иванович Аляхов 1978 çулта ,ç мухтавĕн III степень Орденне илме тивĕçнĕ. Чылай çул вăл «Чăваш АССРĕн чи лайăх механизаторĕ», соцсоревновани çĕтерÿçи пулнă.
10 çул каялла йывăр чирлесе ÿкнĕ, икĕ урасăр тăрса юлнă. Çамрăк чухне Николай Иванович юрă-ташă ăсти пулнă, концертсене хутшăннă, кÿршĕ ялсене те тухса çÿренĕ.
Çамрăк чухнехи юрăсене Николай Иванович артистсемпе пĕрле хăй те юрларĕ. Ачасене курса, итлесе ларнă чухне куçĕсенче савăнăç куççулĕ йăлтăртатрĕ. Ачасем те кил хуçи тараватлăхĕпе кăмăллă пулчĕç, чейпе хăналанчĕç, аквариумри ылтăн пулăсемпе киленчĕç.
Çак тĕлпулу пурне те килĕшрĕ. Çынна савăнăç кÿме ăшă сăмах, ырă кăмăл, чун-чĕре ăшши кирлĕ. Пирĕн те çакна манас марччĕ.
Н.ФЕДОРОВА,
шкулти истори учителĕ.